91 வயது தியாகிக்கு ஓய்வூதியம் உத்தரவை எதிர்த்து வழக்கு: கலெக்டரிடம் முறையிட ஐகோர்ட் கிளை உத்தரவு

பதிவு செய்த நாள் : 15 பிப்ரவரி 2018 01:18


மதுரை:

ஓய்வூதியம் கோரும் 91 வயது தியாகியின் வக்கீல், அனைத்து ஆவணங்களுடன் திண்டுக்கல் கலெக்டர் முன் வரும் 22ம் தேதி ஆஜராகவும், அதனடிப்படையில் கலெக்டர் நடவடிக்கை எடுக்க ஐகோர்ட் கிளை உத்தரவிட்டது.

திண்டுக்கல் மாவட்டம், கொடைக்கானல் பண்ணைக்காடு பகுதியைச் சேர்ந்த கோவிந்தராஜுலு, ஐகோர்ட் கிளையில் தாக்கல் செய்த மனு: நான் சுதந்திர போராட்ட தியாகி. 15 வயதில் சுதந்திர போராட்டத்தில் பங்கேற்றேன். அதனால் ஆங்கிலேய அரசால் கைது செய்யப்பட்டு 3.11.1942ம் ஆண்டு நவம்பர் 3ம் தேதி முதல் 1943ம் ஆண்டு செப்டம்பர் 5ம் தேதி வரை பாளையங்கோட்டை ஜெயிலில் அடைக்கப்பட்டேன். சுதந்திர போராட்ட தியாகிகளுக்கு மாநில அரசு வழங்கும் ஓய்வூதியம் கேட்டு 2013ம் ஆண்டு திண்டுக்கல் கலெக்டர்  மற்றும் பொதுத்துறை இணை செயலர் ஆகியோரிடம் மனு அளித்தேன். நான் சுதந்திர போராட்டத்தில் பங்கேற்று, சிறைக்கு சென்றதற்கு தியாகிகள் மாயாண்டிபாரதி, பெரியசாமி ஆகியோர் சான்றிதழ் அளித்துள்ளனர். இந்த சான்றிதழையும் ஓய்வூதிய விண்ணப்பத்துடன் அனுப்பியிருந்தேன். ஆனால், என் விண்ணப்பத்தை அதிகாரிகள் பரிசீலிக்கவில்லை. ஓய்வூதியத்துக்காக தொடர்ந்து மனு அளித்தும் பலனில்லை. எனவே, ஓய்வூதியம் வழங்க உத்தரவிட வேண்டும். இவ்வாறு மனுவில் கூறியிருந்தார்.

இந்த மனுவை நீதிபதி மகாதேவன் விசாரித்து, மனுதாரருக்கு 2 வாரத்தில் ஓய்வூதியம் வழங்க வேண்டும் என்று கடந்த நவம்பர் 21ம் தேதி உத்தரவிட்டார். இந்த உத்தரவை எதிர்த்து தமிழக அரசின் பொதுத்துறை இணைச்செயலர் ஐகோர்ட் கிளையில் மேல்முறையீடு செய்தார். அதில், ``தியாகிகள் ஓய்வூதியம் பெறுவதற்கு சிறையில் அடைக்கப்பட்டிருந்த காலத்தில் 18 வயது பூர்த்தியடைந்தவராக இருந்திருக்க வேண்டும் என்ற நிபந்தனை உள்ளது. மனுதாரர் இந்த நிபந்தனையை பூர்த்தி செய்யவில்லை. பிறந்த தேதி தொடர்பாக அளித்த சான்றிதழ் ஏற்கும்படி இல்லை. உள்ளூர் டாக்டரிடம் சான்று பெற்றுள்ளார். இது செல்லத்தக்கது அல்ல. அதன்படி பிறந்த தேதியை உறுதிப்படுத்த வேண்டுமென்ற நிபந்தனையையும் பூர்த்தி செய்ய மனுதாரர் தவறிவிட்டார். இந்த குறைபாடுகளை தனிநீதிபதி கவனத்தில் கொள்ளவில்லை. 20 ஆண்டுகள் தாமதத்துடன் தாக்கல் செய்யப்பட்டுள்ள மனுவை தனி நீதிபதி ஏற்றுக்கொண்டுள்ளார். இது ஏற்கத்தக்கதல்ல. தியாகிகள் ஓய்வூதியம் பெறுவதற்கான முக்கிய நிபந்தனைகளை இவர் பூர்த்தி செய்யாத காரணத்தால், தியாகிகள் ஓய்வூதியம் வழங்க உத்தரவிட்ட தனிநீதிபதியின் உத்தரவை ரத்து செய்ய வேண்டும்'' என்று கூறியிருந்தார்.

இந்த மனுவை நீதிபதிகள் சத்தியநாராயணன், ஹேமலதா ஆகியோர் விசாரித்து, மனுதாரர் தரப்பு வக்கீல், அனைத்து ஆவணங்களுடன் திண்டுக்கல் கலெக்டர் முன் வரும் 22ம் தேதி நேரில் ஆஜராகி விளக்கமளிக்க வேண்டும். அதனடிப்படையில் கலெக்டர் நடவடிக்கை எடுக்க வேண்டும். இவ்வாறு உத்தரவிட்டு விசாரணையை மார்ச் 21ம் தேதிக்கு ஒத்திவைத்தனர்.