சபாநாயகர் ஆணைக்கு பிறகே நீதிமன்றம் தலையிட முடியும்: திமுக மனுவுக்கு ஓபிஎஸ் சார்பில் பதில்

பதிவு செய்த நாள் : 14 பிப்ரவரி 2018 20:51

 சென்னை

திமுக கொறடாவும், எம்.எல்.ஏ-வுமான சக்கரபாணி,  சென்னை உயர் நீதிமன்றத்தில் தாக்கல் செய்த மனுவில் கூறியது:

தமிழக முதல்வர் எடப்பாடி கே.பழனிசாமி அரசு மீது கடந்த 2017 ம் ஆண்டு பிப்ரவரி மாதம் 18 ஆம் தேதி தமிழக சட்டப்பேரவையில் நம்பிக்கை கோரும் தீர்மானத்தின் மீது வாக்கெடுப்பு நடத்தப்பட்டது. அதில், எதிர்கட்சித் தலைவர் மு.க.ஸ்டாலின் உள்ளிட்ட திமுக எம்எல்ஏ- க்கள் வலுக்கட்டாயமாக பேரவையில் இருந்து  வெளியேற்றப்பட்டனர் . அதன் பிறகு நடந்த நம்பிக்கை வாக்கெடுப்பில் அதிமுக எம்எல்ஏ- க்களான ஓ.பன்னீர்செல்வம்  மற்றும் அவரது ஆதரவு எம்எல்ஏ-க்கள்  11 பேர், தற்போதைய தமிழக  முதல்வர் கே. பழனிசாமிக்கு எதிராக வாக்களித்தனர்.

கோவை எம்எல்ஏ அருண்குமார் வாக்கெடுப்பை புறக்கணித்தார்.

அரசுகொறடா உத்தரவை  மீறி செயல்பட்ட இந்த எம்எல்ஏ- க்களை தகுதி நீக்கம் செய்யக்கோரி ஏற்கெனவே சட்டப் பேரவைத் தலைவரிடம்  மனு அளித்தும் எந்த நடவடிக்கையும் எடுக்கப்படவில்லை.

கடந்த ஆகஸ்டு 22 ஆம் தேதி முதல்வர் மீது நம்பிக்கை இல்லை எனக்கூறி ஆளுநரிடம் கடிதம் கொடுத்த டிடிவி.தினகரன் ஆதரவு எம்எல்ஏ- க்கள் 18 பேரை மட்டும், சட்டப்பேரவைத் தலைவர் ஒரு தலைப்பட்சமாக  தகுதி நீக்கம் செய்துள்ளார். எனவே, ஓபிஎஸ் மற்றும் அவருக்கு ஆதரவாக வாக்களித்த எம்எல்ஏ -க்களை தகுதி நீக்கம் செய்ய வேண்டும் என சக்கரபாணி கூறியிருந்தார்.

தினகரன் ஆதரவாளரான தகுதி நீக்கம் செய்யப்பட்ட எம்.எல்.ஏ வெற்றிவேல் உள்ளிட்டோரும்    இதே கோரிக்கையுடன்  மனு தாக்கல் செய்தனர்.

 இந்த வழக்குகள் அனைத்தும், தலைமை நீதிபதி இந்திரா பானர்ஜி, நீதிபதி அப்துல் குத்தூஷ் ஆகியோர் முன்பு 2வது நாளாக நேற்று விசாரணைக்கு வந்தது .  அப்போது, திமுக தரப்பில் ஆஜரான மூத்த வழக்கறிஞர் கபில் சிபல், 'சட்டமன்ற விதிகளின்படி அளிக்கப்பட்ட புகாரை சபாநாயகர், பரிசீலிக்க வேண்டும் அல்லது நிராகரிக்க வேண்டும் என்பது அரசியல் சாசன கடமை. ஆனால், இந்த வழக்கில் கடந்த ஆண்டு மார்ச் மாதம் 20ஆம் தேதி அளிக்கப்பட்ட தகுதி நீக்க புகாரை சபாநாயகர் இதுவரை பரிசீலிக்கவும் இல்லை.  நிராகரிக்கவும் இல்லை .  அரசியல் சாசன பதவி வகிப்பவர், தன் அரசியல் சாசன கடமையை செய்ய தவறும்போது , அந்த விஷயத்தில் நீதிமன்றம் தலையிடலாம்.

அரசுக்கு எதிராக வாக்களித்தவர்கள் மீது நடவடிக்கை எடுக்க கோரிய புகாரில் சபாநாயகர்,  பாரபட்சமாக நடந்துள்ளார்'  என குற்றம் சாட்டினார்.

தினகரன் ஆதரவாளர் வெற்றிவேல் தரப்பில் ஆஜரான மூத்த வழக்கறிஞர் பி.எஸ். ராமன், இந்த வழக்கில்: பன்னீர் செல்வம் அணியினர் தாக்கல் செய்த பதில் மனுவில், கடந்த ஆண்டு பிப்ரவரி 18 ஆம் தேதி நடத்தப்பட்ட நம்பிக்கை வாக்கெடுப்பில் அரசுக்கு ஆதரவாக வாக்களிக்க வேண்டும் என கூவத்தூரில் இருந்த 122 எம்.எல்.ஏ. க்களுக்கு மட்டுமே கொறடா உத்தரவு பிறப்பிக்கப்பட்டதாக தெரிவிக்கப்பட்டுள்ளது எனத் தெரிவித்தனர்.

கொறடா உத்தரவு என்பது அனைத்து எம்.எல்.ஏ. க்களுக்குமானது தான். குறிப்பிட்ட எம்.எல்.ஏ.க்களுக்கு கொறடா உத்தரவு பிறப்பிக்கப்பட வில்லை என கூறமுடியாது. முதல்வர் நம்பிக்கை வாக்கெடுப்பு கோரினால், கொறடா உத்தரவு பிறப்பிக்காவிட்டாலும் ஆளுங்கட்சி எம்.எல்.ஏ.க்கள் அரசுக்கு ஆதரவாக மட்டுமே வாக்களிக்க வேண்டும் .  ஆனால், பன்னீர்செல்வம் உள்ளிட்ட 11 பேர் அவ்வாறு செயல்படவில்லை. அவர்கள் அரசுக்கு எதிராக வாக்களித்தனர்' என்று தெரிவித்தார் .

துணை முதல்வர் தரப்பில் ஆஜரான மூத்த வழக்கறிஞர் சி.எஸ்.வைத்தியநாதன், வாதிடுகையில், ' சபாநாயகர் எந்த ஒரு முடிவும் எடுக்காத நிலையில், இந்த விவகாரம் தொடர்பாக நீதித்துறை ஆய்வு செய்ய முடியாது.

அதனால் முதலில் இந்த வழக்கு விசாரணைக்கு உகந்தது அல்ல. தள்ளுபடி செய்ய வேண்டும் என்று கூறினார்.

சபாநாயகரிடம் அளித்த புகாரில் முடிவை அவர் அறிவித்த பிறகே நீதிமன்றம் தலையிட முடியும்.

கூவத்துரில் இருந்த 122 எம்.எல்.ஏ. க்களுக்கு மட்டுமே கொறடா உத்தரவு பிறப்பிக்கப்பட்டது. பன்னீர்செல்வம் உள்ளிட்டோர்க்கு பிறப்பிக்க வில்லை ' என்று சி.எஸ்.வைத்தியநாதன் தெரிவித்தார் .

இதையடுத்து, வழக்கின் அடுத்த விசாரணையை பிப்ரவரி 22 ஆம் தேதிக்கு நீதிபதிகள் தள்ளி வைத்தனர்.

அன்று, துணை முதல்வர் பன்னீர்செல்வம் மற்றும் அரசுக்கு எதிராக வாக்களித்த 11 எம்.எல்.ஏ க்கள் சார்பில் ஆஜராகும் மூத்த வழக்கறிஞர் சி.எஸ். வைத்தியநாதன் தனது வாதத்தை முன்வைத்து வாதிடவுள்ளார் .