கட்டணம் உயர்த்தாமல் போக்குவரத்து கழகங்களை நடத்த முதல்வரிடம் ஸ்டாலின் ஆலோசனை அறிக்கை தாக்கல்

பதிவு செய்த நாள் : 13 பிப்ரவரி 2018 13:07

சென்னை,

தமிழக அரசு பேருந்து டிக்கெட் கட்டணத்தை உயர்த்தாமல் லாபம் வரும் வகையில் போக்குவரத்து கழகங்களை நடத்துவது எப்படி என விளக்கும் விரிவான அறிக்கை ஒன்றை, தமிழக முதல்வர் எடப்பாடி கே. பழனிசாமியிடம் தமிழக எதிர்க்கட்சித் தலைவர் மு.க. ஸ்டாலின் இன்று தலைமைச் செயலகத்தில் உள்ள முதல்வர் அறைக்கே சென்று வழங்கினார்.

தமிழக முதல்வர் எடப்பாடி கே பழனிசாமியை எதிர்க்கட்சித் தலைவர் மு.க. ஸ்டாலின் முதன்முறையாக முதல்வர் அறைக்கே சென்று சந்தித்து பேசினார்.

போக்குவரத்து கழகங்களின் பிரச்சினைக் குறித்து விரிவாக ஆய்வு நடத்துவதற்காக டி.ஆர். பாலு தலைமையில் ஒரு குழுவை திமுக அமைத்தது. அந்தக் குழு  போக்குவரத்து ஆய்வு அறிக்கையை தயாரித்துள்ளது. அந்த அறிக்கையின் பிரதியை முதல்வரிடம் தந்து ஸ்டாலின் விளக்கமளித்தார்.

போக்குவரத்து கழக இழப்பீடுகளை அரசே ஏற்க வேண்டும் என ஆய்வறிக்கையில் கூறப்பட்டு உள்ளது.

தலைமைச் செயலகத்தில் முதல்வருடன் நடைபெற்ற  சந்திப்பில் போக்குவரத்து துறை அமைச்சர் எம்.ஆர். விஜயபாஸ்கரும்  பங்கேற்றார்.

முதல்வர் எடப்பாடி கே. பழனிசாமி - சட்டமன்ற எதிர்க்கட்சி தலைவர் மு.க. ஸ்டாலின் சந்திப்பின்போது, அதிமுக சார்பில் துணை முதல்வர் ஓ. பன்னீர்செல்வம், அமைச்சர்கள் திண்டுக்கல் சீனிவாசன், கே.ஏ. செங்கோட்டையன், எஸ்.பி. வேலுமணி, தங்கமணி, ஜெயக்குமார், எம்.ஆர். விஜயபாஸ்கர் ஆகியோரும் திமுக சார்பில் ம. சுப்பிரமணியன், ஏ.வ. வேலு, சேகர் பாபு ஆகியோரும் உடனிருந்தனர்.

முதல்வர் சந்திப்பிற்கு பின்  மு.க. ஸ்டாலின் செய்தியாளர்களிடம் கூறியதாவது:

போக்குவரத்துக் கழக சீரமைப்பு தொடர்பாக 27 பரிந்துரைகள் அடங்கிய அறிக்கை முதலமைச்சரிடம் சமர்ப்பிக்கப்பட்டது.

திமுக ஆய்வறிக்கையில் உள்ள 27 கோரிக்கைகளை அமல்படுத்தினால் பேருந்து பயண கட்டண உயர்வு தேவையில்லை. டீசல் மீதான மதிப்புகூட்டு வரியை ரத்து செய்யவும் யோசனை கூறியுள்ளோம்.  அந்த வரியை ரத்து செய்தால் டீசல் விலை தானாகக் குறையும் என திமுக தரப்பில் தெரிவிக்கப்பட்டது.

போக்குவரத்துத் துறையில் கமிஷன் வாங்காமல் இருந்தாலே நஷ்டம் ஏற்படாது. தி.மு.க தரப்பில்  ஆய்வறிக்கையை வழங்கிய பிறகு முதல்வர் தரப்பில் இருந்து எந்த உறுதியும் வழங்கவில்லை.

பரிந்துரைகள் மீது நடவடிக்கை இல்லையென்றால், அனைத்துக்கட்சி கூட்டத்தை கூட்டி முடிவெடுக்கப்படும். என ஸ்டாலின் குறிப்பிட்டார்.

சட்டப்பேரவையில் எந்த அடிப்படையில் ஜெயலலிதா படம் திறக்கப்பட்டது . ஜெயலலிதா இன்று உயிரோடு இருந்திருந்தால் சசிகலாவுடன் சிறையில் இருந்திருப்பார்.

குடியரசுத் தலைவர், பிரதமர் மற்றும் ஆளுநரை அழைத்தும், படத்திறப்பு விழாவில் அவர்கள் பங்கேற்காதது ஏன்? ஜனநாயகத்தை காக்கும் சட்டப்பேரவையில் ஜெயலலிதா படத்தை வைத்ததை ஏற்க முடியாது.

இவ்வாறு, திமுக செயல்தலைவர் மு.க.ஸ்டாலின்  கூறினார்.

முதல்வர் பழனிசாமி – திமுக செயல்தலைவர் சந்திப்பின்போது அளிக்கப்பட்ட அறிக்கையின் முழு வடிவத்தைக் காண இங்கே சொடுக்கவும்.

https://drive.google.com/open?id=1KWA-iyON1_pmSDPn8o8MUELQTq2kglkc