சனிபெயர்ச்சி: திருநள்ளாறில் லட்சக் கணக்கான பக்தர்கள் இன்று தரிசனம்

பதிவு செய்த நாள் : 19 டிசம்பர் 2017 18:41

திருநள்ளாறு,

திருநள்ளாறில் இன்று சனிபெயர்ச்சியை முன்னிட்டு லட்சக்கணக்கான பக்தர்கள் தரிசனம் செய்தார்கள்.

புதுச்சேரி மாநிலம், காரைக்காலை அடுத்துள்ள திருநள்ளாறில் புகழ்பெற்ற சனிபகவான் ஸ்தலமான தர்பாரண்யேஸ்வரர் கோயில் அமைந்துள்ளது. சனி தோஷ நிவர்த்திக்கு பிரசித்தி பெற்ற ஸ்தலமாக விளங்கும் இந்த கோயிலில் சனி பகவானுக்கு என்று தனி சன்னதி உள்ளது.
சனி பகவான் இரண்டரை ஆண்டுகளுக்கு ஒரு முறை ஒரு ராசியிலிருந்து மற்றொரு ராசிக்கு பெயர்ச்சி அடை வதையொட்டி இங்கு சனிப் பெயர்ச்சி விழாவாக கொண்டாடப்பட்டு வருகிறது.
சூரிய மண்டலத்தை சுற்றிவர அதிக நாட்கள் எடுக்கும் கிரகம் சனி. ஒவ்வொரு ராசியிலும் இரண்டரை முதல் மூன்று ஆண்டுகள் வரை இருப்பார். 12 ராசிகளையும் வலம் வர 30 ஆண்டுகள் ஆகும்.  எனவே சனிப்பெயர்ச்சி முக்கியத்துவம் வாய்ந்தது.

வாக்கிய பஞ்சாங்கப்படி இன்று (டிசம்பர் 19)  காலை 10.01 மணிக்கு விருச்சிக ராசியில் இருந்து தனுசு ராசிக்கு பெயர்ச்சியடைந்தார். 2020 டிசம்பர் 20 வரை தனுசு ராசியில் சனிபகவான் இருப்பார்.

2017ஆம் ஆண்டுக்கான சனிப்பெயர்ச்சி விழா நேற்று இரவு முதல் துவங்கியது.

இன்று காலை 6:00 மணி முதல் 7:00 மணி வரை சனி பகவானுக்கு நல்லெண்ணை, மஞ்சள், திரவியப்பொடிகள், சந்தனம், பன்னீர், பழங்கள், பஞ்சாமிர்தம், தேன், பால், தயிர் போன்றவைகளால் சிறப்பு அபிஷேகம் நடந்தது.  பின்னர் சகஸ்ரநாம அர்ச்சனை நடைபெற்றது. இதனை தொடர்ந்து உலக நன்மைக்காக 27 நட்சத்திரங்கள், 12 ராசிகளுக்கு சங்கல்பம் செய்யப்பட்டு சிறப்பு ஆராதனை நடந்தது.

சரியாக காலை 10.01 மணிக்கு சனி பகவான் விருச்சிக ராசியிலிருந்து தனுசு ராசிக்கு இடம் பெயர்ந்தார். அப்போது சனி பகவானுக்கு மகாதீபாராதனை காண்பிக்கப்பட்டது. இதில் ஏராளமான பக்தர்கள் கலந்து கொண்டு சனி பகவானை தரிசனம் செய்தனர்.

சனி பகவானை வழிபட தமிழகம், புதுவை மற்றும் பல்வேறு மாநிலங்களில் இருந்து பக்தர்கள்  நேற்று இரவு முதலே திருநள்ளாறு வரத்தொடங்கினர். இன்று காலையிலும் ஏராளமான பக்தர்கள் வந்து குவிந்த வண்ணம் இருக்கின்றனர்.

சனி பெயர்ச்சியன்று தனி வழிபாடு செய்வதற்காக சுமார் 10 லட்சத்துக்கும் அதிகமான பக்தர்கள் திருநள்ளாறில் குவிந்துள்ளனர்.

சனிப்பெயர்ச்சி பலனை ராசி வாரியாக தெரிந்துகொள்ள கீழே சொடுக்கவும்

http://dinamalarnellai.com/web/sanipeyarchi