மும்பை குண்டுவெடிப்பு குற்றவாளி தாவூத் இப்ராகிம் 3 சொத்துக்கள் ரூ.11.58 கோடிக்கு ஏலம்

பதிவு செய்த நாள் : 15 நவம்பர் 2017 04:05


மும்பை:

மும்பை குண்டுவெடிப்பு வழக்கின் முக்கிய குற்றவாளி தாவூத் இப்ராகிமின் 3 சொத்துக்கள் ரூ. 11.58 கோடிக்கு ஏலம் விடப்பட்டது.

    இந்திய வர்த்தக தலைநகர் மும்பையில் 1993ம் ஆண்டு  நூற்றுக்கணக்கானவர்களை பலி கொண்ட தொடர் குண்டுவெடிப்பு வழக்கின் முக்கிய குற்றவாளி கடத்தல் மன்னன் என்று அழைக்கப்படும் தாவூத் இப்ராகிம் ஆவார். பாகிஸ்தானில் மறைந்து வாழும் இவர் இந்திய அரசால் தேடப்படும் குற்றவாளியாக அறிவிக்கப்பட்டு இருக்கிறார்.

 இதற்கிடையே  முறைகேடாக வெளிநாடுகளுக்கு பணப் பரிமாற்றம் செய்தது மற்றும் கள்ளக்கடத்தல்  உள்பட வழக்குகளில் தாவூத் இப்ராகிமுக்கு சொந்தமாக மும்பையில் உள்ள 3 சொத்துகளை ஏலம்விட நிதி அமைச்சக அதிகாரிகள்  நடவடிக்கை எடுத்தனர்.

     இதைத்தொடர்ந்து  மும்பையில் உள்ள டில்லி சைக்கா எனப்படும்  ஓட்டல் ரவுனக் அப்ராஸ்,  ஷப்னம் விருந்தினர்  விடுதி மற்றும் டமார்வாலா கட்டிடத்தில் தாவூத் இப்ராகிமுக்கு சொந்தமான 6 அறைகள் நேற்று  ஏலம் விடப்பட்டது. ஓட்டல் ரவுனக் அப்ராஸ் ரூ.4.53 கோடிக்கும், ஷப்னம் விருந்தினர்  விடுதி ரூ.3.52 கோடிக்கும், டமார்வாலா கட்டிடத்தில் உள்ள 6 அறைகள் ரூ. 3.53 கோடி ரூபாய்க்கும் ஏலம் போனது.

   இந்த 3 சொத்துக்களையும் அதிகபட்ச விலையான ரூ.11.58 கோடிக்கு சைபி புர்ஹானி அப்ளிப்மென்ட் என்ற  அறக்கட்டளை ஏலத்தில் வாங்கியுள்ளது குறிப்பிடத்தக்கது.