சிறுநீருக்கும் விலை வந்தாச்சு... ஒரு கேன் 10ரூபாய்: மத்தியஅரசு புதிய திட்டம்

பதிவு செய்த நாள் : 15 நவம்பர் 2017 01:36


நாக்பூர்:

நாடு முழுவதும் தாலுகா தோறும் சிறுநீர் சேமிப்பு வங்கி அமைக்க மத்தியஅரசு முடிவு செய்துள்ளது. இதன்  மூலம் யூரியா உரம் தயாரித்து விவசாயிகளுக்கு விநியோகம் செய்யப்படும். விவசாயிகள் பத்து லிட்டர் கேனில் சிறுநீர் சேமித்துக் கொடுத்தால் ரூ.10 வழங்கப்படும் என்று மத்திய அமைச்சர் நிதின் கட்கரி கூறிஉள்ளார்.

மத்திய சாலைப்போக்குவரத்து துறை அமைச்சர் நிதின்கட்கரி  நாக்பூரில் நிருபர்களிடம் கூறியதாவது:

மனிதர்களின் சிறுநீரில் ஏராளமான நைட்ரஜன் உள்ளது. ஆனால், அனைத்தும் வீணடிக்கப்படுகிறது. வீணாகச் செல்வதை  லாபமாக மாற்றுவதே எனது கொள்கை.  இது ஒன்றும் மோசமான யோசனை அல்ல. எனவே வட்டங்கள் தோறும்  சிறுநீர்சேமிப்பு வங்கி ஏற்படுத்தப் போகிறோம்.  அதில் இருந்து யூரியா உரம் தயாரிக்க திட்டமிடப்பட்டுள்ளது. இதை செயல்படுத்துவது பற்றி சுவீடன் நாட்டு விஞ்ஞானிகளுடன் ஆலோசனை நடத்தி வருகிறேன்.   இந்த திட்டத்தை அமல்படுத்துவதில் எந்த சங்கடமும் இல்லை. பாஸ்பரஸ் மற்றும் பொட்டாசியத்திற்கு மாற்றாக இயற்கை உரம் உள்ளது. இதனுடன் நைட்ரஜனை சேர்க்கும் போது விவசாயிகளுக்கு உதவும். அரசின்  இந்த முடிவு ஆரம்ப நிலையில் தான் உள்ளது.  இதற்கான ஆரம்ப கட்ட சோதனை நாக்பூர் பக்கம் உள்ள தபேவாடா கிராமத்தில்(கட்கரி சொந்த ஊர்) நடந்தது.  

சிறுநீரை சேகரிப்பதற்காக விவசாயிகளுக்கு பத்து லிட்டர் கேன்கள் வழங்கப்படும். அதில் சிறுநீரை சேகரித்து தாலுகாவில் உள்ள மையங்களில் கொடுத்தால் லிட்டருக்கு ஒரு ரூபாய் பெற்றுக்கொள்ளலாம்.  இதற்கான கேன்களை அரசே விநியோகம் செய்யும்.  இந்த திட்டம் முதலில் கிராம பகுதிகளில் செயல்படுத்தப்படும்.  இங்குதான், சிறுநீர் தண்ணீருடன் கலந்து கழிப்பறைக்கு செல்லாது. இந்தசிறுநீரை சுத்திகரித்து, சுத்தமான இயற்கை உரமாக உற்பத்தி செய்யலாம். இந்த திட்டத்தின் பொருளாதாரம் மற்றும் சாத்தியம் குறித்து எனக்கு உறுதியாக தெரியாது. நாடு முழுவதும் இதை செயல்படுத்தினால் அபரிமிதமான யூரியா உரம் உற்பத்தி செய்யலாம். இதனால்  யூரியா இறக்குமதி குறையும். இந்த திட்டத்தை செயல்படுத்துவதால் யாருக்கும் பாதிப்பு வரப் போவதில்லை.

இவ்வாறு அவர் கூறினார்.