6 முஸ்லிம் நாடுகளைச் சேர்ந்தவர்களுக்கு டிரம்பின் குடியேற்ற தடை சட்டம்: கலிபோர்னியா நீதிமன்றம் அனுமதி

பதிவு செய்த நாள் : 14 நவம்பர் 2017 18:13

வாஷிங்டன்,

6 முஸ்லிம் நாடுகளை சேர்ந்தவர்கள் அமெரிக்காவில் நுழைய தடைவிதிக்கும் அதிபர் டொனால்ட் டிரம்ப்பின் குடியேற்ற தடை சட்டத்திற்கு கலிபோர்னியா நீதிமன்றம் அனுமதி வழங்கியுள்ளது.

டொனால்ட் டிரம்ப்   அமெரிக்க  அதிபராக  பொறுப்பேற்று  ஒரு வாரத்திற்குள்  8 முஸ்லிம்  நாடுகளை சேர்ந்தவர்கள் அமெரிக்காவில் நுழையக்கூடாது என்று தடை ஆணை  பிறப்பித்தார்.
இந்த உத்தரவுக்கு கடும் கண்டனம் எழுந்தன. டிரப்பின் இந்த குடியேற்ற தடை சட்டத்திற்உ எதிராக  நீதிமன்றங்களில்  வழக்குகள் தொடுக்கப்பட்டன. அதிபர் டிரம்ப் சட்டத்தில் சில திருத்தங்கள் செய்து இறுதியில் 6 நாடுகளுக்கு தடை விதித்தார். ஆனால் டிரப்பின் உத்தரவுக்கு நீதிமன்றங்கள் இடைக்கால தடை விதித்தன.  

இந்நிலையில் கடந்த அக்டோபர் 19-ம் தேதி, ஈரான், லிபியா, சோமாலியா, சூடான், சிரியா மற்றும் ஏமன் ஆகிய  6  முஸ்லிம்  நாடுகளை  சேர்ந்த பயணிகள், வெனிசுலாவை  சேர்ந்த குறிப்பிட்ட சில அதிகாரிகள், வடகொரியா பயணிகள் ஆகியோர் அமெரிக்காவில் நுழைய  அதிபர்  டொனால்டு டிரம்ப்  மீண்டும் புதிய திருத்தப்பட்ட தடை  சட்டத்தில் கையெழுத்திட்டார்.

ஆனால் இது போன்ற ஆணை பிறப்பிக்க அமெரிக்க அதிபருக்கு அதிகாரம் இல்லை என கூறி இந்த தடைக்கு எதிராக  ஹவாய் மாகாண அரசு உள்ளூர் கோர்ட்டில் வழக்கு தொடர்ந்தது.  இந்த வழக்கை விசாரித்த நீதிபதி டிரம்பின் இந்த தடை ஆணைக்கு இடைக்கால  தடை விதித்து உத்தரவிட்டார்.

நீதிமன்றத்தின் இந்த உத்தரவை எதிர்த்து  டிரம்ப் நிர்வாகம்  கலிபோர்னியா  மாகாணத்தின் உள்ளூர் நீதிமன்றத்தில்  வழக்கு தொடர்ந்தது. மூன்று நீதிபதிகள் அடங்கிய அமர்வு திங்கட்கிழமை இந்த வழக்கை  விசாரித்தனர். விசாரணை முடிவில் ஆறு  முஸ்லிம் நாடுகளை சேர்ந்த பயணிகள் அமெரிக்காவில் நுழைய  தடை  விதிக்கும் ஆணைக்கு நீதிபதிகள் அனுமதி வழங்கி உத்தரவிட்டனர்.

அந்த உத்தரவுபடி  ஈரான், சிரியா, லிபியா, ஏமன், சோமாலியா, சாத் ஆகிய ஆறு முஸ்லீம் நாடுகளை சேர்ந்த பயணிகள் அமெரிக்காவிற்குள் நுழைய தடை விதிப்பட்டுள்ளது. ஆனால் தடைவிதிக்கப்பட்ட நாடுகளைச் சேர்ந்தவர்களின்   நெருங்கிய ரத்தசொந்தங்கள்  அமெரிக்காவில்  இருந்தால்  அவர்களுக்கு தடையில் இருந்து விலக்கு அளிக்கப்படும்.
மேலும் டிரம்பின் இந்த குடியேற்ற தடை சட்டம் மீது நீதிமன்றம் அளிக்கும்  உத்தரவுகள் எதுவும் வெனிசுலா மற்றும் வடகொரியா சேர்ந்தவர்கள் மீதான தடையை பாதிக்காது.