இன்று குழந்தைகள் தினம்: நேரு சிலைக்கு தமிழக ஆளுநர் -ஓ.பி.எஸ்., அமைச்சர்கள் மலர் தூவி மரியாதை

பதிவு செய்த நாள் : 14 நவம்பர் 2017 11:52

சென்னை,

முன்னாள் பிரதமர் ஜவகர்லால் நேருவின் 128-வது பிறந்தநாள் இன்று நாடு முழுவதும் குழந்தைகள் தினமாக கொண்டாடப்படுகிறது. சென்னை கிண்டியில் உள்ள ஜவஹர்லால் நேருவின் உருவசிலைக்கு ஆளுநர் பன்வாரிலால், துணை முதல்வர் ஓ.பன்னீர்செல்வம் மற்றும் அமைச்சர்கள் மலர் தூவி மரியாதை செலுத்தினர்.

முன்னாள் பிரதமர் ஜவகர்லால் நேருவின் 128-வது பிறந்தநாள் இன்று நாடு முழுவதும் குழந்தைகள் தினமாக கொண்டாடப்படுகிறது.  நேருவின் உருவச் சிலைக்கு மாலை அணிவித்து மரியாதை செலுத்தப்பட்டு வருகிறது. ஆங்காங்கே நேருவின் உருவப்படங்கள் அலங்கரித்து வைக்கப்பட்டும் மரியாதை செலுத்தப்படுகிறது.

பண்டிட் ஜவகர்லால் நேருவின் பிறந்தநாளில் அவருக்கு மரியாதை செலுத்துவதாக பிலிப்பைன்ஸில் நடைபெறும் ஆசியன் மாநாட்டில் கலந்துகொள்ள சென்றுள்ள இந்திய பிரதமர் மோடி டுவிட்டரில் குறிப்பிட்டுள்ளார். 

சென்னை - கிண்டி கத்திப்பாராவில் உள்ள நேரு சிலைக்கு தமிழக ஆளுநர் பன்வாரிலால் புரோகித் மரியாதை செலுத்தினார். நேரு சிலைக்கு கீழ் அலங்கரித்து வைக்கப்பட்டுள்ள உருவப்படத்திற்கு ஆளுநர் மலர் தூவி மரியாதை செலுத்தினார்.

தமிழக துணை முதல்வர் ஓ.பன்னீர்செல்வம், அமைச்சர்கள் ஜெயக்குமார், மாஃபா க. பாண்டியராஜன், பெஞ்சமின், கடம்பூர் ராஜூ, முன்னாள் அமைச்சர் பா.வளர்மதி உள்ளிட்டோரும் நேருவின் உருவப்படத்திற்கு  மலர் தூவி மரியாதை செலுத்தினர்.

நவம்பர் 14ம் தேதி குழந்தைகள் தினமான இன்று சென்னை அரசு அருங்காட்சியகத்தில் பள்ளி மாணவ - மாணவிகளுக்கு ஓவியப் போட்டி, பேச்சுப் போட்டி நடத்தப்பட்டு பரிசுகள் வழங்கப்படுகின்றன.

புதுச்சேரி முதல்வர் மரியாதை

புதுச்சேரி முதல்வர் நாராயணசாமி, சபாநாயகர் வைத்திலிங்கம் மற்றும் அமைச்சர்கள் புதுச்சேரியில் உள்ள நேரு சிலைக்கு மாலை அணிவித்தும், நேரு உருவப்படத்திற்கு மலர் தூவியும் மரியாதை செய்தனர்.