நேருவின் 128-வது பிறந்தநாள்: பிரணாப் முகர்ஜி, மன்மோகன்சிங் உள்ளிட்டோர் மரியாதை

பதிவு செய்த நாள் : 14 நவம்பர் 2017 11:24

புதுடில்லி,

ஜவஹர்லால் நேருவின் 128வது பிறந்த நாளையொட்டி அவரது நினைவிடத்தில் முன்னாள் குடியரசுத் தலைவர் பிரணாப் முகர்ஜி, முன்னாள் பிரதமர் மன்மோகன் சிங் உள்ளிட்டோர் மரியாதை செலுத்தினர்.



நாட்டின் முதல் பிரதமரான ஜவஹர்லால் நேருவுக்கு இன்று பிறந்த தினமாகும். நேருவின் 128 வது பிறந்த நாளையொட்டி டில்லியில் உள்ள நேருவின் நினைவிடம் மலர்களால் அலங்கரிக்கப்பட்டு இருந்தது. நேருவின் நினைவிடத்தில் முன்னாள் குடியரசுத் தலைவர் பிரணாப் முகர்ஜி, முன்னாள் பிரதமர் மன்மோகன் சிங்  ஆகியோர் மரியாதை செலுத்தினர்.

பிலிப்பைன்ஸ் சுற்றுப் பயணத்தில் உள்ள பிரதமர் மோடி, சமூக வலைதளமான டுவிட்டரில், 

நேருவுக்கு மரியாதை செலுத்துவதாக தெரிவித்துள்ளார்.

மத்திய உள்துறை அமைச்சர் ராஜ்நாத்சிங் தனது டுவிட்டரில், 

ஜவஹர்லால் நேருவின் 128 வது பிறந்த நாளையொட்டி அவரை நினைவு கூர்வதாகவும், தேசத்துக்கு அவர் ஆற்றிய பங்களிப்பு மறக்க முடியாதது என தெரிவித்துள்ளார்.

ராகுல்காந்தி டுவிட்டர் செய்தி:

சிறந்த கருணையுள்ள மனிதரின் பிறந்த நாள் இன்று. அவர் நம்முடன் நினைவுகளில் தொடர்ந்து வாழ்கிறார். என முன்னாள் பிரதமர் ஜவஹர்லால் நேருவின் பிறந்தநாளில் தனது தாத்தாவின் நினைவை டுவிட்டரில் பதிவிட்டுள்ளார் ராகுல்

பண்டித ஜவஹர்லால் நேரு, ஆகஸ்ட் 15, 1947ம் ஆண்டு இந்தியாவின் முதல் பிரதமராக பதவியேற்றார்.

1889ம் ஆண்டு நவம்பர் 14ம் தேதி உத்தர பிரதேசத்தில் உள்ள அலகாபாத்தில் பிறந்த நேரு, 1964ம் ஆண்டு மே 27ம் தேதி இயற்கையெய்தினார். 

நேருவின் பிறந்த நாள், நவம்பர் 14 நாடு முழுவதும் குழந்தைகள் தினமாக கொண்டாடப்படுகிறது.