மேலப்பாளையம் மகான் பஷீர் அப்பா வலியுல்லாஹ்

பதிவு செய்த நாள்

19
பிப்ரவரி 2016
13:00

இறைநேசச்செல்வர்களான ‘அவ்லியாக்கள்’ என்ற ‘வலிமார்கள்’ லட்சக்கணக்கான பேர் உலகம் முழுவதும் சென்று இஸ்லாம் மார்க்கப் பிரச்சாரம் செய்து வந்தனர். உலகம் முழுவதும் இஸ்லாமை பரப்பியதில் இவர்கள் முக்கியப் பங்கு வகித்துள்ளனர்.

இந்தியாவில் எண்ணற்ற வலிமார்கள் வாழ்ந்துள்ளதாக வரலாறுகள் கூறுகின்றன. பாக்தாத்தில் முஹ்யித்தீன் அப்துல் காதிர் ஜெய்லானி (ரஹ்), அஜ்மீரில் ஹாஜா முஹ்யித்தீன் ஜிஸ்தி (ரழி), தமிழகத்தில் நாகூர் ஷாகுல் ஹமீது ஒலி பாதுஷா ஆகிய வலிமார்களின் புகழ் இன்னும் மங்காமல் தழைத்தோங்குகிறது. அதே போல் சென்னையில் கோவளம் தமீமுன் அன்சாரி (ரழி), மவுண்ட்ரோடு மூஸாஷா காதிரி (ரழி), எழும்பூர் மோத்திபாபா (ரழி), ராயபுரம் குனங்குடி மஸ்தான் (ரழி), தக்கலையில் ஞான மாமேதை பீர் முஹம்மது அப்பா ((ரழி) உள்பட இன்னும் எண்ணிலடங்கா வலிமார்கள் வாழ்ந்து மறைந்துள்ளனர். . 

தூத்துக்குடி மாவட்டத்தில் ஆழ்வார்திருநகரி பக்கீர்பாவா (ரழி) வலியுல்லாஹ், தெற்குத் தெரு சம்சுதீன் அவ்லியா, மேலப்பாளையத்தில் கல்வத் நாயகம் தர்காவில் யூசுப் நாயகம், அப்துல் காதர் நாயகம், ரசூல் வாப்பா அவ்லியா, சாகுல் ஹமீது தங்கள், அஹ்மத் கபீர் சுல்தானுல் ஆரிபீன் ரிஃபாஈ (ரழி) நாயகம் வழியில் வந்த வெள்ளை கலீபா அமீருல்லாஷா வலியுல்லாஹ், வாபர் பள்ளி அப்துல் காதர் நாயகம், பஷீர் அப்பா வலியுல்லாஹ் போன்ற எண்ணற்ற வலிமார்களின் சிறப்பு மேன்மை தங்கியது.

வலிமார்கள் என்ற இறைநேசர்களின் சக்தி இன்னும் நிதர்சனமாக உள்ளது. உடலால் மறைந்தாலும், இவர்களின் ஆன்மா இறைவனின் சக்தியால் உயிர் பெற்று வாழ்கிறது. இவர்களில் மேலப்பாளையம் பஷீர் அப்பா வலியுல்லாஹ் அவர்களின் பிறப்பு மேன்மை நிறைந்தது. அல்லாஹ்வின் மீது அவர் கொண்ட உண்மையான பற்று, அன்பு, காதலால் அல்லாஹ் அவருக்கு பல அற்புத சக்திகளை வழங்கினான். கண் பார்வை இன்றி பஷீர்அப்பா  நடத்திய காட்டிய அதிசயங்கள், அற்புதங்கள் அல்லாஹ்வின் மகிமைகளை பறை சாற்றுகிறது.

ஹிஜ்ரி 1100ம் ஆண்டுகளில் பஷீ்ர் அப்பா வலியுல்லாஹ் வாழ்ந்ததாக வரலாறுகள் கூறுகின்றன. அவரது அடக்கஸ்தலம் நெல்லை, மேலப்பாளையம் மஞ்சூட்டு தெருவில், கடைய ஜும்மா பள்ளியின் தென் புறத்தில் உள்ளது. குழந்தை பாக்கியம் இல்லாதவர்கள், திருமணமாகாத பெண்கள் பஷீ்ர் அப்பாவிடம் சென்று முறையிட்டால் அல்லாஹ்வின் கிருபையால் நன்மை கிட்டும் என்கின்றனர் அந்த பகுதி மக்கள்.

பஷீர் அப்பாவின் வாழ்க்கை வரலாறு;– 

மேலப்பாளையம் நகருக்கு வருகை தந்த ஏழு குடும்பங்களில் ஒன்றான தக்கரி என்ற குடும்பத்தில் உதுமான் லெப்பை –  ஹவ்வா உம்மாள்  தம்பதிகளுக்கு ஹிஜ்ரி 1141  முஹர்ரம் பிறை 6–ல் பஷீர் அப்பா பிறந்தார்கள். இவர்களுக்கு பெற்றோர்கள் இட்ட பெயர் முஹம்மது முஹ்யித்தீன்.

குழந்தை பருவத்தில் கண் பார்வை போனது

குழந்தை முஹம்மது முஹ்யித்தீன் ஒரு வயது பாலகராக இருக்கும் போதே அம்மை நோய் இரு கண்களும் பார்வையை இழந்தன. இதனால் மனம் வருந்திய பெற்றோர்கள் நெடு நாட்களாக சகித்துக் கொள்ளாததால் தங்கள் குடும்பத்தின் சற்குருவான கோஜ் முஹம்மது ஆலிம் வலியுல்லாஹ் அவர்களிடம் அழைத்து சென்று தங்கள் குழந்தைக்காக அல்லாஹ்விடம் துஆ செய்யுமாறு வேண்டினார்கள்.

வளர்ப்பு மகனாக ஏற்றுக் கொண்ட கோஜ் ஆலிம்

குழந்தையின் வருங்கால  சிறப்பை அறிந்த மஹான் கோஜ் முஹம்மது ஆலிம் வலியுல்லாஹ் அவர்கள் அப்பெற்றோரிடம் இந்த பிள்ளையை என்னிடமே விட்டு செல்லுங்கள் நீங்கள் கவலைப்பட வேண்டாம் நான் என் பிள்ளையாக பார்த்து கொள்கிறேன் சென்றார்கள் அவர்களும் மஹான் உடைய வளர்ர்ப்பில் சிறப்பாக இருக்கும் என உணர்ந்து, நம்பிக்கையுடன் விட்டுச் சென்றார்கள்.

முதுகில் எழுதி குர்ஆனை கற்றார்

பாலகர் முஹம்மது முஹ்யித்தீன் அவர்கள் மஹான் கோஜ் முஹம்மது ஆலிம் வலியுல்லாஹ் அவர்கள் வீட்டிலேயே வளர்ந்தார்கள். குழந்தைக்கு கல்வி கற்று கொடுக்க விரும்பிய மஹான் அவர்கள் அவர் முதுகையே கரும்பலகையாக பயன்படுத்தி திருக்குரான் எழுத்துக்களை அவர் முதுகில் எழுதிக்காட்டி மனத்தால் அவர் உணரும் அளவுக்கு எழுதி சொல்லி கொடுத்தார். மஹான் பஷீர் அப்பா ஒலியுல்லாஹ் அவர்கள் இவ்வாறு குர்ஆன் வசனங்களையும், நபிகள் நாயகம் (ஸல்லல்லஹூ அலைஹி வஸல்லம் அவர்களின் பொன் மொழிகளான ஹதீஸ் மற்றும் சட்ட திட்டங்களையும் கற்று கொண்டார்கள்

கிலுறு நபி (அலை)யுடன் உரையாடல்

மஹான் கோஜ் முஹம்மது ஆலிம் வலியுல்லாஹ் அவர்கள் கடை வீதிக்கு சென்று விட்டு வீடு திரும்பிய சமயத்தில் மாணவர் முஹம்மது முஹ்யித்தீனுடன் யாரோ பேசிக்கொண்டிருப்பதுபோல் சத்தம்  கேட்டு உள்ளே வந்து பார்க்க யாருமில்லை மாணவர் மட்டுமே இருந்தார். மாணவரிடம் யாரோடு பேசிக் கொண்டிருந்தீர்கள் என கேட்டார். அதற்கு மஹான் அவர்கள் யார் என்று தெரியவில்லை குரல் உங்கள் குரல் போன்று இருந்தது அவர் எனது வாயை திறக்க சொன்னார். உடனே நான் வாயைத் திறந்தேன் அவர் எனது வாயினுள் அவரது உமிழ் நீரை உமிழ்ந்தார். நான் அதை அப்படியே விழுங்கி விட்டேன் அந்த உமிழ் நீர் நல்ல மதுரமானதொரு நீர் போன்று சுவை மிகுந்திருந்தது என்று மஹான் அவர்கள் கூறினார்கள்.  கோஜ் அப்பா அவர்களாலும் தெரிய முடியவில்லை

உடனே அவர் காலத்தில் வாழ்ந்த மஹான் மாப்பிள்ளை லெப்பை ஆலிம் அவர்களிடம் சென்று நடந்த விபரத்தை கூறி கேட்டார்கள் அவர்கள் உடனே சொன்னார்கள், அது கிலுறு நபி (அலை) என்று கூறினார்கள் இதன் மூலம் வரும் காலத்தில் முஹ்யத்தீன் சிறந்த இறையருள் பெற்றவராக வருவார் என்பதயும் மஹான்  கோஜ் அப்பா அவர்கள் புரிந்து கொண்டார்கள்

இந்நிகழ்ச்சிக்கு பின் முஹ்யித்தீன் அவர்கள் வாழ்க்கையில் பல மாறுதல்கள் உண்டாகின. அவர்கள் எப்போதும் தனித்திருக்க பிரியப்பட்டார்கள் பிறரிடம் அதிகமாக பேசுவதில்லை குறைவாகவே உண்டார்கள் அல்லாஹ்வை பற்றிய சிந்தனையே அவரிடம் இருந்து வந்தது. 

பைஅத் பெறுதல்

ஒரு நாள் சுஃபுஹூ தொழுகை முடிந்த பின் மஹான் அவர்கள் கோஜ் அப்பா அவர்களிடம் எனக்கு பைஅத் பெற எண்ணமாக உள்ளது பைஅத் தாருங்கள் என்றார்கள். அதற்கு கோஜ் அப்பா அவர்கள் சிறப்பு மிகு தகுதி பெற்றிருக்கும் உனக்கு நான் பைஅத் தருவது சரி அல்ல. எனது குருநாதர் தான் உனக்கும், குருவாக இருக்க முடியும் என்று கூறினார்கள். இதை கேட்ட குழந்தை முஹம்மது முஹ்யித்தீன் (பஷீர் அப்பா) அவர்கள் அல்லாஹ்வின் நாட்டப்படி தான் எல்லாமே நடக்கும் என்று கூறி விட்டு அமைதியாகி விட்டார்கள்.

நாட்கள் செல்ல செல்ல மஹான் பஷீர் அப்பா அவர்களுக்கு இறை காதல் அதிகமாவதை கண்ட மஹான் கோஜ் அப்பா அவர்கள் திருநெல்வேலி மாவட்டத்திலுள்ள கடையநல்லூர் என்ற ஊரில் தனது குருநாதர் சிஸ்தியா தரீக்காவில் புகழ் பெற்ற மஹான் ஷெய்கு உதுமான் வலியுல்லாஹ் அவர்களிடம் தன்னுடைய வளர்ப்பு பிள்ளையை அறிமுகம் செய்து வைத்தார்கள். கண் தெரியாத இந்த பிள்ளையின் ஆன்மீக உயர்வை விளங்கிய மஹான் ஷெய்கு உதுமான் வலியுல்லாஹ் அவர்கள் பை அத் கொடுத்து பஷீர் என்று அழைக்குமாறு கூறி தரீக்காவில் கலீபா பதவியும் கொடுத்தார்கள்

திருமண பருவம்

கோஜ் அப்பா அவர்கள் பிள்ளை பஷீருக்கு திருமணம் செய்து வைக்க விரும்பி ராமநாதபுரம் மாவட்டம் கமுதியை சேர்ந்த ஒருவர் தனது மகள் கமருன்னிசாவை பெண் கொடுக்க சம்மதித்து, திருமணமும் இனிதாக நடை பெற்று முடிந்து ஒரு ஆண் குழந்தை பிறந்தது அதற்கு கோஜ் அப்பா அவர்கள் பெயரே வைக்கப்பட்டது

மக்களுக்கு நல்லுரைகள்

(மக்களை நன்மையின் பக்கம் அழைத்தல்) மஹான் பஷீர் அப்பா அவர்களின் நல்லுரைகளை கேட்க்க மக்கள் கூட்டம் மேலப்பாளையம் ஊரில் அலைமோதியது. ஒரு சமயம் இவர்கள் பேச்சை கேட்க வந்த பாளையங்கோட்டை ஆற்காடு நவாப் அவர்களின் சகோதரர் நவாப் மஹபூப் கான் அவர்கள் மஹான் அவர்களின்  பேச்சின் சிறப்பையும், உயர்வையும் அறிந்து, நன்கொடைகள் பல வழங்கியதுடன், அப்பா அவர்களிடம் பைஅத்தும் பெற்றார்கள் மேலும் மஹான் அவர்களின் உண்மை நிலையையும், தூர இடங்களில் உள்ளவைகளையும், நடப்பவைகளை தெரிந்து கொள்ளும் கஷ்ப் என்னும் தூரதரிசனம் பெற்றிருக்கும் ஆற்றலை அறிந்த மக்கள் மஹான் அவர்களை “ஷாயீர்,” “ஆஷிக் ரசூல்,”  “தென்னாட்டு ஷெய்குல் அக்பர்,”  “மாமேதை,”  “பஷீர் அக்பர்” என பல சிறப்பு பெயர்களால் புகழ்ந்தார்கள் அவரிடம் பைஅத் பெறுபவர்கள் நாளுக்குநாள் அதிகமாகி கொண்டே இருந்தது.

மஹான் பஷீர் அப்பா வலியுல்லாஹ் அவர்கள் தமிழ் புலவராகவும் விளங்கினார்கள். மஹான் பஷீர் அப்பா வலியுல்லாஹ் அவர்களின் அற்புதங்கள்:– திருநெல்வேலி மாவட்டம் ஐயூப்கான்புரத்தில் இருந்து ஹஸனா லெப்பை, கலந்தர் லெப்பை என்ற இருவர் மஹான் அவர்களை சந்திக்க வந்தார்கள். வரும் வழியிலே தாமிரபரணி ஆற்றில் குளித்துவிட்டு இருவரும் பஷீர் அப்பா அவர்களால் ஹதீஸை எல்லாம் படிக்க முடியாதே எப்படி நல்ல கருத்துக்களை சொல்ல முடியும் என பேசிக்கொண்டே வருகிறார்கள். இதை தன் அகப்பார்வையால் அறிந்த மஹான் அவர்கள், வீட்டில் தனது துணைவியாரிடம் விருந்தாளிகள் இரண்டு பேர் வருகிறார்கள் அவர்களுக்கு நெய் சோறு சமைக்கும் படி கூறினார்கள்

அவ்விருவரும் வீடு வந்ததும் வரவேற்று நீங்கள் மார்க்கம் சம்பந்தமான வினாக்களை கேட்க வந்துள்ளீர்கள். மிகவும் மகிழ்ச்சி. அதற்கு முன்னால் நீங்கள் வரும் வழியில் தாமிரபரணி ஆற்றில் குளித்தீர்கள். குளிக்கும் முன் உங்களது பணப்பையை ஆற்றங்கரையிலுள்ள ஒரு கற்றாழை செடி அருகில் வைத்தீர்கள். அதை எடுக்காமல் வந்துவிட்டீர்கள் என்றதும் இருவரும் சென்று எடுத்து விட்டுவந்தார்கள். பிறகு அப்பா அவர்களிடம் மர்ர்க்க அறிவு பெற்று குருவாக ஏற்று கலிபா உடைய அந்தஸ்தும் பெற்றார்கள். இவ்விரு கலீபாக்களும் ஐயூப் கான் புறத்திலுள்ள ஒரு தர்காவில் அடங்கப்பட்டுள்ளர்கள்.

திருநெல்வேலி மாவட்டத்திலுள்ள பொட்டல் புதூர் என்ற ஊரிலுள்ள முஹையதீன் ஆண்டகை அவர்களின் தர்காவில் சந்தன கூடு ஊர்வலம் நடக்கும் நிகழ்ச்சியை காண விரும்பி மஹான் அவர்களின் துணைவியார் பக்கத்து வீடு குடும்பத்தினருடன் சென்று வரலாம் என நினைத்து அப்பாவுடைய வருகையை காத்திருந்தார்கள். நெடு நேரமாகியும் வராததால் பக்கத்து வீட்டு குடும்பத்தார் சென்று விட்டார்கள் மஹான் அவர்கள் வந்ததும் அவர் துணைவியார் கூறவே அப்பா அவர்கள் முஹையதீன் ஆண்டகை அவர்களின் சந்தன கூடு தானே பார்க்க வேண்டும் என்று சொல்லி தனது ஆள்காட்டி விரலால் பக்கத்திலுள்ள சுவரில் கோடு போட்டு பார்க்குமாறு கூறினார்கள்.

அதில் சந்தனகூடு ஊர்வலம் தெரிந்தது மட்டும் அல்லாமல் பக்கத்து வீட்டு குடும்பத்தினர் கை குழந்தையுடன் ஒரு கடையில் மிட்டாய் வாங்கியதையும் பார்த்தார்கள். அதே கடையின் மிட்டாயை மஹான் அவர்கள் மனைவியருக்கு கொடுத்தார்கள். மறுநாள் அக்குடும்பத்தினர் வந்ததும் இந்நிகழ்ச்சியை கூறி விசாரித்து மிட்டாயுடைய சுவை பற்றியும் சொன்னார்கள் பிறகு இந்நிகழ்ச்சி முற்றிலும் உண்மைதான் என அந்த குடும்பத்தினரும் கூறினர்

அப்பா அவர்களிடத்தில் பேரன்பு கொண்ட ஒரு துணி வியாபாரி இருந்தார். அவர் தலையில் சுமந்து கொண்டு துணிகளை விற்று வந்தார். அவருக்கு நாகூர் செல்ல வேண்டும், அப்பா அவர்களை அழைத்து செல்ல வேண்டும் என்று விரும்பி, பணம் சேர்த்து அப்பாவிடம் தன எண்ணத்தை சொன்னார். அதற்கு அப்பா அவர்கள் எனக்கு பார்வை இல்லை, ஆகையால் நெடுதூர பயணம் செல்ல முடியாது என்று கூறிவிட்டு, அங்கு போகும் சமயத்தில் வந்து தன்னை சந்தித்துவிட்டு செல்லும் படியும் சொல்லிவிட்டார்கள்.

அதே போல் புறப்படும் சமயம் அப்பாவிடம் சொல்லவே அப்பா அவர்கள் ஒரு வெறும் தாளில் தன் ஆட்காட்டி விரலால் ஏதோ எழுதி ஒரு கவரில்  போட்டு துணி வியாபாரிடம் கொடுத்து நாகூர் கந்தூரி முடிந்து மறுநாள் கடற்கரையில் தேரோட்டம் பார்க்கச் செல்லும் போது வழியில் ஒரு மரத்தடியில் பச்சை சால்வை போர்த்தி கொண்டு பக்கீர் போல் ஒருவர் இருப்பார் அவரிடம் இந்த கடிதத்தை கொடுத்துவிட்டு, பதில் கடிதம் தருவார் வாங்கி வாருங்கள் என்றார்கள்.

அதேபோல் அவர் சென்று கந்தூரி முடித்த மறுநாள் கடற்கரை சென்று பார்த்தார்கள். பக்கீர் அவர்கள் புன் முறுவலுடன் பார்த்து படித்துவிட்டு அவரும் தன் ஆட்காட்டி விரலால் ஏதோ எழுதி அதனை ஒரு கவரில் போட்டு கொடுத்தார்கள். பிறகு துணி வியாபாரி அப்பாவும் மையோ, எழுத்து கோலோ இல்லாமல் எழுதுகிறார், இவரும் மையோ, எழுத்துகோலோ இல்லாமல் எழுதுகிறாரே என யோசித்துக்கொண்டு ஊர் வந்து கொடுத்து அந்த பக்கீர் பற்றி சொல்லி யார் என கேட்டார்கள்.

அப்பா அவர்கள் நீர் சந்தித்தீரே அவர்தான் நாகூர் ஆண்டகை என்றார்கள். கேட்டதும் துணி வியாபாரி கைசேதம் அடைந்தார்கள் உடனே அப்பா அவர்கள் வருத்தப்பட வேண்டாம் உங்களுக்கு ஆன்மீக பக்குவம் அவ்வளவு தான் என்றார்கள்.

கல்வத் ஆண்டகை அவர்களும் மஹான் பஷீர் அப்பா வலியுல்லாஹ் அவர்களும் கல்வத் ஆண்டகை அவர்களின் இயற் பெயர் செய்யது அப்துல் காதர் இவர் கல்வத் என்னும் தனித்து இருந்து வணக்கம் புரிந்ததால் கல்வத் ஆண்டகை என்ற பெயர் உண்டாகியது

கல்வத் ஆண்டகை அவர்கள் பல நாட்கள் தனித்திருந்து வணங்கி வந்தார்கள். அப்போது ஒருநாள் ஓர் இரவில் அவகளின் வலது பக்கம் 500 புலிகளும் இடது பக்கம் 500 பாம்புகளும் நின்று பயமுறுத்துவதை போன்று உணர்ந்தார்கள். பூமிலிருந்து ஆகாயம் வரை நெருப்பு ஜுவாலைகள் பற்றி எரிந்ததாகவும் பார்த்தார்கள். இவற்றை கண்டு கல்வத் ஆண்டகை அவர்கள் மிகவும் அச்சமுற்றார்கள். அந்நேரத்தில் மஹான் பஷீர் அப்பா வலியுல்லாஹ் அவர்கள் தோன்றி எனது மகனே நீர் ஒன்றும் பயப்பட வேண்டாம் னான் அனுபவித்த துயரங்களுக்கு இது எம்மாத்திரம் ? கொஞ்சமும் அஞ்சாமல் இரும் இத்தொல்லைகள் எல்லாம் விரைவில் தொலைந்துவிடும் என்று கூறி மறைந்தார்கள்

இந்நிகழ்ச்சியை மேலப்பாளையம் புலவர் காளை ஹஸன் அவர்கள் ‘கல்வத்மாலை’ என்னும் நூலில் புகழ்ந்து கூறியுள்ளார்கள். மஹான் பஷீர் அப்பா வலியுல்லாஹ் அவர்கள் இயற்றிய பாடல்கள் மெய்ஞான சதகம்,

மெய்ஞான ஆனந்த களிப்பு, நாகூரார் பிள்ளை தமிழ், வண்ணப்பாக்கள், கப்பல் பாட்டு, ஞான இசைப் பாடல்கள், இனிய தமிழில் பாடி உள்ளார்கள். 

மஹான் பஷீர் அப்பா வலியுல்லாஹ் அவர்கள் மீது பாடப்பட்ட பாடல்கள் வருமாறு மேலப்பாளையம் தைக்கா புலவர் ஷாகுல் ஹமீது புலவர்  ‘முனாஜாத்து ‘ என்னும் பாடலையும்,  மேலப்பாளையம் பள்ளி உதுமான் லெப்பை ‘மவ்லீத்’ என்னும் பாடலையும், அப்துல் ஹமீது லெப்பை ஆலிம் அவர்கள் ‘பாமாலை’ என்னும் பாடலையும், மேலப்பாளையம் கல்வத் கலீபா யூசுப் நாயகம் அவர்களின் அரபி பைத்தையும், மேலப்பாளையம் ஜமால் செய்யது முஹம்மது ஆலிம் அவர்கள் ‘பஷீர் அப்பா மாலை’ என்னும் பாடலையும் பாடி உள்ளார்கள்.

பஷீர் அப்பா வலியுல்லாஹ் அவர்களின் மறைவு

ஞானப்புலவர் மஹான் பஷீர் அப்பா வலியுல்லாஹ் அவர்கள் 75  ஆண்டுகள் இவ்வுலகில் வாழ்ந்தார்கள். ஹிஜ்ரி 1216 ரஜப் பிறை 19  ல் இவ்வுலகை விட்டு மறைந்தார்கள். ஆண்டு தோறும் அந்த நாளில் கந்தூரி விழா வெகு விமர்சியைாக கொண்டாடப்படுகிறது. இவர் அடக்கஸ்தலம் மேலப்பாளையம் கடைய ஜும்மா பள்ளியின் தென் புறத்தில் உள்ளது.

தகவல் உபயம் –  அபுபக்கர், நிர்வாகி – பஷீர் அப்பா தர்கா. 7200 738360