பயங்கரவாத தடை சட்டத்தின் கீழ் கைது செய்யப்பட்டுள்ள தமிழர்களை விடுதலை செய்யக் கோரி ஹர்த்தால்

பதிவு செய்த நாள் : 13 அக்டோபர் 2017 16:33

யாழ்ப்பாணம்

பயங்கரவாத தடை சட்டத்தின் கீழ் சிறைச்சாலைகளில் அடைக்கப்பட்டுள்ள 132 தமிழ்க் கைதிகளை விடுவிக்கக் கோரி இலங்கையின் வடக்கு பகுதியில ஆர்ப்பாட்டம், கடையடைப்பு, பள்ளிகள் அடைப்பு, உண்ணாவிரதப் போராட்டங்கள் நடைபெற்றன.


அநுராதபுரம் சிறைச்சாலையில் உண்ணாவிரதம் இருக்கும் அரசியல் கைதிகளுக்கு ஆதரவு தெரிவித்தும், அவர்களது கோரிக்கைகளை உடனடியாக நிறைவேற்ற வேண்டும் என வலியுறுத்தியும் யாழ்ப்பாணத்தில் இன்று பூரண ஹர்த்தால் நடந்தது.

இந்த ஹர்த்தால் காரணமாக யாழ்ப்பாணத்தில் எப்பொழுதும் பரபரப்பாக காணப்படும் அனைத்து இடங்களும் முடங்கி கிடந்தன. சில மருந்து கடைகளைத் தவிர வேறு எந்த கடைகளோ, வியாபார நிலையங்கள், உணவு விடுதிகள் என அனைத்தும் மூடப்பட்டுள்ளன. அத்துடன் இன்று பள்ளிக்கூடங்களும் மூடிக்கிடந்தன.

யாழ்ப்பாணம் மத்திய பேருந்து நிலையம், திருநெல்வேலி வர்த்தக நிலையம், ஆகியவற்றிலும் கூட்டம் இல்லை. உண்ணாவிரதம் இருக்கும் அரசியல் கைதிகளுக்கு ஆதரவு தெரிவித்து 20க்கு மேற்பட்ட மக்கள் சேவை அமைப்புகளும்  அரசியல் கட்சிகளும் இணைந்து இன்று வடக்கில் பூரண ஹர்த்தாலுக்கு அழைப்பு விடுத்திருந்தன.

வவுனியா, கிளிநொச்சி, மன்னார், முல்லைத்தீவு, ஆகிய நகரங்களிலும் வர்த்தக நிலையங்கள் மூடிக்கிடந்தன.. அரசு, தனியார் பேருந்துகளும் இயங்கவில்லை. அரசு அலுவலகங்கள், வங்கிகள் போன்றவற்றின் பணிகள் பாதிக்கப்பட்டன.

இப்போது ஏன் போராட்டம்?

யாழ்ப்பாணத்தில் நடைபெறவுள்ள தேசிய தமிழ்த் தின விழாவின் பரிசளிப்பு விழாவுக்கு வருகை தரவுள்ள ஜனாதிபதி மைத்திரிபால சிறிசேனவின் கவனத்தை ஈர்த்து அரசியல் கைதிகளின் விடுதலைக்கு உரிய நடவடிக்கை எடுப்பதற்கான அழுத்தத்தைக் கொடுப்பதற்காகவே இந்தக் கடையடைப்பு மேற்கொள்ளப்பட்டிருந்தது.

உண்ணாவிரதத்துக்கு காரணம் என்ன?

அனுராதபுரம் சிறைச்சாலையில் கடந்த இரண்டு வார காலமாக உண்ணாவிரதப் போராட்டத்தி;ல் ஈடுபட்டுள்ள முன்னாள் விடுதலைப்புலி உறுப்பினர்களான இராசதுரை திருவருள், மதியழகன் சுலக்ஷன், கணேசன் தர்ஷன் ஆகிய மூவரும் கடந்த 8 வருடங்களாக தடுத்து வைக்கப்பட்டிருக்கிறார்கள்.

முல்லைத்தீவு மாவட்டம் வள்ளிபுனம் என்ற இடத்தில் 26 அரச படையினரை 2009ஆம் ஆண்டு ஜனவரி மாதம் கொலை செய்ததாக இவர்கள் மீது குற்றம் சுமத்தப்பட்டு பயங்கரவாதத் தடைச்சட்டத்தின் கீழ் வழக்கு தாக்கல் செய்யப்பட்டுள்ளது.

இந்த வழக்கு விசாரணை 4 வருடங்களாக வவுனியா மேல் நீதிமன்றத்தில் நடந்து வந்தது. இந்த வழக்கின் சாட்சிகளான இராணுவத்தினருக்கு உயிரச்சுறுத்தல் விடுக்கப்பட்டிருப்பதனால், அவர்கள் வவுனியாவுக்கு வந்து சாட்சியமளிக்க முடியாதிருப்பதாகத் தெரிவிக்கப்பட்டுள்ளது.

இதனால் இந்த வழக்கை சிங்களப் பிரதேசமாகிய அனுராதபுரம் மேல் நீதிமன்றத்திற்கு மாற்ற வேண்டும் என சாட்சிகள் தரப்பில் விடுத்த வேண்டுகோளுக்கு அமைய இந்த வழக்கு சட்டமா அதிபரினால் (அட்டோனி ஜெனரல்) அனுராதபுரத்திற்கு மாற்றப்பட்டுள்ளது.

ஆனால், இந்த வழக்கு சிங்களப் பிரதேசமாகிய அனுராதபுரத்திற்கு மாற்றப்பட்டிருப்பதனால், குற்றம் சாட்டப்பட்டுள்ள தமிழ் அரசியல் கைதிகளுக்கு மொழிப்பிரச்சினை ஏற்பட்டுள்ளது. அத்துடன் அவர்களுடைய சட்டத்தரணிகளும் அங்கு செல்வதற்கு இயலாதவர்களாக இருக்கின்றார்கள்.

எனவே, இந்த வழக்கை வவுனியா மேல் நீதிமன்றத்திலேயே விசாரிக்க வேண்டும் என்று இந்தக் கைதிகள் கோரி வருகின்றனர். நாட்டின் பல்வேறு சிறைச்சாலைகளில் 132 தமிழ் அரசியல் கைதிகள் உரிய விசாரணைகளின்றி பல வருடங்களாகத் தடுத்து வைக்கப்பட்டிருக்கின்றார்கள். இவர்கள் அனைவரும் நிபந்தனைகளின்றி விடுதலை செய்யப்பட வேண்டும் என்ற கோரிக்கைகளை முன்வைத்து இன்றைய கடையடைப்பு மேற்கொள்ளப்பட்டிருக்கின்றது.

இதற்கிடையில், தமிழ் விருட்சம் அமைப்பினர் அந்தணர் ஒன்றியத்துடன் இணைந்து அரசியல் கைதிகளின் விடுதலைக்காக வவுனியா குட்செட் வீதி கருமாரியம்மன் ஆலயத்தில் விசேட வழிபாடுகளை நடத்தினர்.