2ம் உலகப்போரின் போது கோவாவில் மூழ்கடிக்கப்பட்ட ஜெர்மன் கப்பல்களை மீட்க முடிவு

பதிவு செய்த நாள் : 12 அக்டோபர் 2017 20:15

பனாஜி:

இரண்டாம் உலகப்போரின் போது, கோவா கடல்பகுதியில் மூழ்கடிக்கப்பட்ட 3 ஜெர்மானிய கப்பல்களின் சிதைவுகளை மீட்க கோவா துறைமுகக் கழகம் முடிவு செய்துள்ளது.

இரண்டாம் உலகப்போரின் போது ஜெர்மனி, ஜப்பான், இத்தாலி ஆகிய நாடுகள் ஒரு அணியிலும், அமெரிக்கா, பிரிட்டன் உள்பட நேச நாடுகள் மற்றொரு அணியிலும் இணைந்து போரிட்டன.
இந்தியா அப்போது பிரிட்டனின் காலனியாதிக்கத்தில் இருந்தது. கோவா அப்போது போர்த்துக்கீசியர்களின் கட்டுப்பாட்டில் இருந்தது.
உலகப்போர் உக்கிரமாக இருந்த 1943ம் ஆண்டு மார்ச் மாதம் ஜெர்மனிக்கு சொந்தமான எரன்ஃபெல்ஸ், டிராச்சன்ஃபெல்ஸ், ப்ரவுன்ஃபெல்ஸ் ஆகிய 3 ஜெர்மானிய கப்பல்களை கோவாவின் மர்கோவா துறைமுகத்தில் பிரிட்டன் கப்பல்கள் தாக்கி மூழ்கடித்தன.
மூழ்கடிக்கப்பட்டு 60 ஆண்டுகள் கடந்த நிலையில் அந்தக் கப்பல்களின் சிதைவுகள் இன்னும் கடலுக்கு அடியில் உள்ளன.

இந்நிலையில், கப்பல்களின் சிதைவுகள் கிடக்கும் பகுதியில் ஒரு மீன்பிடி துறைமுகம் மற்றும் சரக்குப் பெட்டகம் அமைக்க முடிவு செய்யப்பட்டுள்ளது. துறைமுகப்பணிகள் துவங்கும்போது, கடலுக்கு அடியில் கிடக்கும் ஜெர்மானிய கப்பல்களின் உடைந்த பாகங்கள் மீட்கப்படும் என்று கோவா துறைமுகக்கழக தலைவர் ஐ.ஜெயக்குமார் தெரிவித்தார். உடைந்த பாகங்கள் எதற்கும் பயன்படாது. தொல்லியல் துறையும் இதில் அதிக ஆர்வம் காட்டவில்லை. எனவே, கடல் நீருக்கு அடியிலேயே அவற்றை துண்டுகளாக உடைத்து விடுவோம் என்று இன்னொரு அதிகாரி கூறினார். அதேசமயம், யாரேனும் அவற்றை பாதுகாக்க விரும்பினால் அவர்களுக்குத் தர தயாராக இருக்கிறோம் என்றும் அவர் தெரிவித்தார்.