அனுமதி பெறாத வீட்டுமனைகளை வரன்முறைப்படுத்த புதிய விதி அறிவிப்பு

பதிவு செய்த நாள் : 12 அக்டோபர் 2017 19:36

சென்னை:

அனுமதி பெறாத வீட்டுமனைகளை வரன்முறைப்படுத்த புதிய விதிகளை தமிழக அரசு அறிவித்துள்ளது.

புதிய விதிகளில் மிகவும் முக்கியமானது. விற்கப்படாத மனைகளின் பரப்பளவில் 10 சதவீத நிலத்தை திறந்த வெளி ஒதுக்கீட்டுப் பகுதிக்காக ஒதுக்கீடு செய்து அந்த நிலத்தை உள்ளாட்சி நிறுவனத்திற்கு தானமாக வழங்கப்படவேண்டும். அப்பொழுது திறந்தவெளிப்பகுதி ஒதுக்கீட்டு விதிகளில் இருந்து விலக்கு அளிக்கப்படும்.
இந்தப் புதிய திருத்தத்தின்கீழ் அனுமதி பெறாத வீட்டுமனைகளை வரன்முறைப்படுத்த மேலும், 6 மாத காலம் அவகாசம் வழங்கப்படும். அவகாசம் 3.5.2018 வரை நீட்டிக்கப்பட்டுள்ளது.

தமிழக அரசு வெளியிட்டுள்ள ஆணை பற்றிய விவரம்:

அனுமதியற்ற வீட்டுமனைகளை விலைக்கு வாங்கியுள்ள விவரம் அறியாத பொதுமக்களின் இன்னல்களைப் போக்கும் வகையில் இம்மனைப் பிரிவுகள் மற்றும் மனைகளை வரன்முறைப்படுத்த ஒரு புதிய திட்டம் வகுக்கப்பட்டு அரசாணை எண்.78, வீட்டு வசதி மற்றும் நகர்ப்புற வளர்ச்சித் துறை, நாள் 4.5.2017ல் தமிழ்நாடு அரசால் அறிவிக்கப்பட்டது.

மேற்கண்ட திட்டத்தைச் செயல்படுத்துவதில் உள்ள நடைமுறை சிக்கல்கள் குறித்து மனுக்கள் வந்தன.

இக்கோரிக்கை மனுக்களையும், கருத்துகளையும் அரசு கவனமாகப் பரிசீலித்தும், 11.10.2017 அன்று நடைபெற்ற அமைச்சரவைக் கூட்டத்திலும் விவாதிக்கப்பட்டு, இத்திட்டத்தில் கீழ்க்கண்ட மாற்றங்கள் செய்யப்பட்டுள்ளன:-

(i)    இந்த திட்டத்தின் காலம் ஆறு மாதத்திலிருந்து ஒரு வருடமாக 03.05.2018 வரை நீட்டிக்கப்பட்டுள்ளது.

(ii)    விற்கப்பட்ட மனைகளின் அடிப்படையில் மனைப்பிரிவுகளை மூன்று வகைகளாகப் பிரித்து வரன்முறைபடுத்தும் முறை நீக்கப்பட்டுள்ளது. இதனால் அனுமதியின்றி பிரிக்கப்பட்ட மனைப்பிரிவுகள் உள்ளது உள்ளபடியே வரன்முறை செய்யப்படும். ஒரு மனைப் பிரிவில் குறைந்த பட்சம் ஒரு மனை விற்கப் பட்டிருந்தால் அந்த மனைப்பிரிவு வரன்முறைப்படுத்தப்படும். மேலும், மனைப்பிரிவில் அமைந்துள்ள சாலைகள் `உள்ளது உள்ளபடி’ நிலையில் வரன்முறைப்படுத்தப்படும்.

(iii)   மனைப்பிரிவு மேம்பாட்டாளர்கள் தங்கள் மனைப்பிரிவில் வரன்முறைப்படுத்தக் கோரும் விற்கப்படாத மனைகளின் பரப்பளவில் 10 சதவீத நிலத்தை OSR-க்காக ஒதுக்கி உள்ளாட்சிக்கு தானமாக வழங்க வேண்டும். OSR (OPEN SPACE RESERVATION) எத்தகைய அளவில் இருப்பினும், விதிகளில் உள்ள கட்டுப்பாடுகள் தளர்வு செய்யப்பட்டுள்ளது. மேலும் தனி நபர்களால் வாங்கப்பட்ட மனையை வரன்முறைப்படுத்தும் போது OSR விதிகளிலிருந்து முழு விலக்கு அளிக்கப்படும்.

(iv)   உத்தேச திருத்த வரன்முறைப்படுத்தும் விதி 8(i) மற்றும் (ii)-க்கு பிறகு கீழ்க்கண்டவை சேர்க்கப்படுகிறது:

(a)   சென்னைப் பெருநகரப் பகுதியில் 5.8.1975 முதல் 20.10.2016 வரை;

(b)   சென்னைப் பெருநகரப் பகுதிக்கு வெளியே அமைந்துள்ள ஊரகப் பகுதிகளில் 29.11.1972 முதல் 20.10.2016 வரை மற்றும்

(c)   சென்னைப் பெருநகரப் பகுதிக்கு வெளியே நகரப் பகுதிகளில் 1.1.1980 முதல் 20.10.2016 வரை ஏற்படுத்தப்பட்ட அனுமதியற்ற மனைப்பிரிவுகள் / மனை உட்பிரிவுகளில் அமைந்துள்ள மனைகளை வரன்முறைப்படுத்த இத்திட்டம் பொருந்தும்.

(d)   மேற்கண்ட தேதிகளுக்கு முன்னர் வாங்கப்பட்ட அனைத்து அனுமதியற்ற மனைப்பிரிவுகள் மற்றும் மனைகள் வரன்முறைப்படுத்தப்பட்டதாகக் கருதப்படும்.

(v)   வளர்ச்சிக் கட்டணம் குறைக்கப்பட்டுள்ளது. அதற்கிணங்க தற்போது செலுத்தப்படவேண்டிய கட்டணங்களின் விவரங்கள் பின்வருமாறு:-

அத்துடன் கூர்ந்தாய்வுக் கட்டணமாக மனை ஒன்றிற்கு ரூ.500/- செலுத்தப்படவேண்டும்.

ஏழை, எளிய மக்களின் நலனையே குறிக்கோளாகக் கொண்டு, செயல்படும் தமிழ்நாடு அரசு, பொதுமக்கள் பெரிதும் பயனடையும் வகையில் மனைப்பிரிவுகள் மற்றும் மனைகளை வரன்முறைப்படுத்தும் திட்டத்தினை மேலும் எளிமைப்படுத்தியும், கட்டணங்களைக் குறைத்தும் ஆணையிட்டுள்ளது.