சிங்கப்பூரின் முதல் பெண் அதிபராக ஹலிமா யாக்கோப் தேர்வு

பதிவு செய்த நாள் : 13 செப்டம்பர் 2017 18:52

சிங்கப்பூர் சிட்டி:

சிங்கப்பூரின் முதல் பெண் அதிபராக ஹலிமா யாக்கோப் (வயது 63) போட்டியின்றி தேர்வு செய்யப்பட்டார். வாக்கெடுப்பு எதுவும் இன்றி அவர் தேர்வு செய்யப்பட்ட விதம் விமர்சனத்துக்கு உள்ளாகி இருக்கிறது.

சிங்கப்பூர் நாட்டில் ஆறாண்டுகளுக்கு ஒருமுறை புதிய அதிபரை தேர்ந்தெடுப்பதற்கான தேர்தல் நடைபெறும். அவ்வகையில் தற்போதைய அதிபர் டோனி டான் பதவிக்காலம் விரைவில் நிறைவடைவதால் வரும் 23-ம் தேதி அதிபர் தேர்தல் நடைபெறும் என கடந்த மாதம் அறிவிப்பு வெளியானது.
இந்த முறை நடைபெறும் தேர்தலில் அந்நாட்டின் சிறுபான்மை சமுதாயத்தை சேர்ந்தவர்கள் மட்டும்தான் போட்டியிடலாம் என்ற விதி வகுக்கப்பட்டது.

இதையடுத்து, அதிபர் தேர்தலில் போட்டியிடப் போவதாக பாராளுமன்ற முன்னாள் சபாநாயகர் ஹலிமா யாக்கோப் அறிவித்திருந்தார்.  இவர் மலாய் முஸ்லிம் ஆவார்.

இதேபோல், இந்திய வம்சாவளியை சேர்ந்த தொழிலபதிபர் முஹம்மது சாலே மரிக்கான் மற்றும் பரித் கான் கைம் கான் ஆகியோரும் இந்த தேர்தலில் போட்டியிட மனுத்தாக்கல் செய்திருந்தனர்.

இந்நிலையில், இந்த தேர்தல் தொடர்பான வேட்பு மனுக்கள் பரிசீலிக்கப்பட்டன. முஹம்மது சாலே மரிக்கான் மற்றும் பரித் கான் கைம் கான் ஆகிய இருவரின் மனுக்கள் தள்ளுபடி செய்யப்படுவதாக தேர்தல் அதிகாரிகள் அறிவித்தனர்.

போட்டியாளர்கள் தகுதி நீக்கம் செய்யப்பட்டுவிட்டதால் ஹலிமா யாக்கோப் மட்டுமே அதிபர் தேர்தல் பந்தயத்தில் இருந்தார். ஆகவே, அவர் போட்டியின்றி தேர்வு செய்யப்பட்டு உள்ளார்.

சிங்கப்பூர் அரசியல் வரலாற்றில் முதல் பெண் அதிபராக ஹலிமா யாக்கோப் முடிசூட உள்ளார்.

போட்டியின்றி அவர் தேர்வு செய்யப்பட்டு இருப்பது தொடர்பாக சமூக வலைதளங்களில் விமர்சனங்கள் எழுந்துள்ளன.