வலஞ்சுழி நுரை விநாயகர்

பதிவு செய்த நாள் : 09 செப்டம்பர் 2017

கும்பகோணம் - தஞ்சை நெடுஞ்சாலையில் திருவலஞ்சுழி என்னும் ஊர் உள்ளது. இந்த ஊரில் உள்ள விநாயகர் வலஞ்சுழிநாதர் என்றழைக்கப்படுகிறார். வலஞ்சுழிநாதர் ஆலயம் மிக பிரசித்தி பெற்றது. இக்கோவில் சோழர்களால் 1000 ஆண்டுகளுக்கு முன்னர் கட்டப்பட்டதாக இக்கோவிலில் உள்ள கல்வெட்டுகள் கூறுகின்றன. திருவலஞ்சுழிநாதர் திருக்கோவில்  சம்பந்தர், அப்பர் ஆகியோரால் பாடல் பெற்ற சிவாலயம் ஆகும். தேவாரப் பாடல் பெற்ற தலங்களில் காவிரியின் தென்கரையில் அமைந்துள்ள 25ஆவது சிவத்தலமாகும். சிவனின் தலமாக இருக்கும் பட்சத்திலும், இங்குள்ள விநாயகர் மிகவும் புகழ்வாய்ந்தவராக விளங்குகிறார்.

சோழர்கால சிற்பக்கலைக்கு சிறந்த எடுத்துக்காட்டாக திருவலஞ்சுழிநாதர் திருக்கோவில்  விளங்குகிறது.

தல வரலாறு

காவிரி நதி திருவலஞ்சுழிநாதர் திருக்கோவிலுக்கு   வலப்புறத்தில் சுழித்துச் செல்கிறது. அதனால் இத்தலத்திற்கு திருவலஞ்சுழி என்று பெயர் வந்தது. அவ்வாறு வலம் சுழித்துச் சென்ற காவிரியில் ஆதிசேஷனால் ஒரு பெரிய பள்ளம் ஏற்பட்டது. பாய்ந்து வந்த காவிரி ஆறு, அந்த பள்ளத்தில் பாய்ந்து பாதாளத்தில் இறங்கிவிட்டது.

அதைக்கண்ட சோழமன்னன் கவலையுற்றுத் திகைத்தபோது, இறைவன் அசரீரியாக பேசியதாக தலவரலாறு கூறுகிறது.,

"ஒரு மன்னனோ ஒரு மகரிஷியோ அப்பாதாளத்தில் தன்னையே பலியிட்டுக் கொண்டால் அப்பிலத்துவாரம் (பள்ளம்) தானாக மூடிக்கொள்ளும். அப்போது காவிரி வெளிப்படும்" என்று அசரீரி கூறியது.

உடனே மன்னன் கொட்டையூர் என்ற ஊரில் ஏரண்டம் என்னும் செடிகள் அடர்ந்து வளர்ந்துள்ள இடத்தில் தவம் செய்துகொண்டிருந்த ஏரண்ட முனிவரிடம் அசரீரி கூறிய செய்தியைச் தெரிவித்தார்.. இதைக் கேட்ட ஏரண்ட முனிவர் நாட்டுக்காகத் தியாகம் செய்ய முன்வந்தார். அவர் அந்த பள்ளத்தில் இறங்கி தன்னைப் பலி கொடுத்தார். அதன் பின்னர் பள்ளம் மூடிக்கொண்டது. அதைத் தொடர்ந்து காவிரி ஆறு வழக்கம் போல பெருக்கெடுத்து ஓடியது.

ஏரண்ட முனிவருக்கு திருவலஞ்சுழிநாதர் திருக்கோவிலில் சிலை இருக்கிறது. இன்றும் மஹாசிவராத்திரி நாளில் இரவில் நான்கு ஜாமங்களிலும் ஆதிசேஷன் வெளிப்பட்டு திருவலஞ்சுழி, திருநாகேஸ்சுரம், திருப்பாம்புரம், நாகைக்காரோணம் ஆகிய 4 தலங்களுக்கும் சென்று வழிபட்டு வருவதாக ஐதீகம்.

திருவலஞ்சுழி

திருவிடை மருதூரானது மகாலிங்கத் தலமாக விளங்க, அதற்குரிய பரிவாரத் தலங்களுள் திருவலஞ்சுழி திருக்கோவில் விநாயகருக்கு உரிய தலமாகும்.

இத்தலத்தில் சிவபெருமானான கற்பகநாதேஸ்வருக்கு தனியாக சந்நிதி அமைந்துள்ளது. கிழக்கு நோக்கிய இராஜகோபுரத்துடன் இவ்வாலயம் கம்பீரமாக காட்சியளிக்கிறது. அம்பாள் பெரியநாயகியின் சந்நிதி இறைவன் சந்நதிக்கு வலதுபுறம் அமைந்துள்ளது.

இத்தகைய அமைப்புள்ள தலங்கள் திருமணத் தலங்கள் என அழைக்கப்படுகின்றன. இதைத்தவிர, அஷ்டபுஜ மஹாகாளிக்கும், வெளிப் பிரகாரத்தில் பைரவருக்கும் தனித்தனி சந்நதிகள் உள்ளன. இங்குள்ள அஷ்டபுஜ மஹாகாளி சக்தி வாய்ந்த தெய்வம் என்று இக்கோவிலுக்கு வரும் பக்தர்கள் கூறுகின்றனர்.

இக்கோவிலில் ஸ்வேத விநாயகர் எழுந்தருளும் மண்டபம் இந்திரனால் அமைக்கப்பட்டது என கல்வெட்டுகள் கூறுகின்றன. சித்திரத் தூண்களும், கல்குத்து விளக்குகளும் கொண்டு அழகான மண்டபமாக விநாயகரின் கருவறைக்கு வெளியே உள்ள மண்டபம் விளங்குகிறது.

இச்சந்நிதியிலுள்ள கருங்கல் பலகணி (கருங்கல்லால் ஆன ஜன்னல்) நுணுக்கமான சிற்ப வேலைப்பாடுடன் திகழ்கிறது. வேறு எங்கும் காணமுடியாத இந்த பலகணியை கண்டால், எவ்வாறு இதனை சிற்பி செதுக்கி இருப்பார் என்று நினைக்கத் தோன்றும்.

இத்தலம் சிவன் கோவில் என்பதைவிட நுரையால் ஆன வெள்ளை விநாயகர் கோவில் என்ற பெயராலேயே அவ்வூர் மக்கள் அழைக்கின்றனர். இத்தலத்தின் தீர்த்தங்களாக காவிரி, அரசலாறு, ஜடாதீர்த்தம் ஆகியவையும், தலமரமாக வில்வமரமும் உள்ளன. இத்தலம் ஒரு திருப்புகழ் பாடல் பெற்ற தலமாகும். இந்த கோவிலின் உட்பிராகாரத்திலுள்ள முருகப்பெருமான் ஆறு திருமுகங்களும், பன்னிரு கரங்களும் கொண்டு மயில் மீதமர்ந்து கிழக்கு நோக்கி எழுந்தருள்கிறார். தேவியர் இருவரும் அருகில் நின்றவாறு காட்சியளிக்கும் முருகப்பெருமானை போற்றி திருப்புகழில் ஒரு பாடல் உள்ளது என்பது குறிப்பிடத்தக்கது.

நுரை விநாயகர்

திருவலஞ்சுழியில் உள்ள தல விநாயகர் ஸ்வேத விநாயகர் என்று அழைக்கப்படுகிறார். தேவர்கள் திருப்பாற்கடலை கடையத் தொடங்கும் முன் விநாயக பூஜை செய்ய மறந்தார்கள். இதன் விளைவாக வாசுகி தன் வாயில் இருந்து ஆலகால விஷத்தை வெளியேற்றியது. இதனை சிவபெருமான் தன்னுடன் எடுத்துக்கொள்ள மீதமுள்ள விஷத்தால் தேவர்கள் பெரிதும் அவதிக்குள்ளாகினர். தங்கள் தவறை உணர்ந்த தேவர்கள், அந்த இடத்தில் விநாயகரை ஆவாஹனம் செய்து பூஜை செய்ய முடிவெடுத்தனர்.

விநாயகரை ஸ்தாபிக்க வேறு ஏதும் இல்லா நிலையில் பொங்கி வந்த பாற்கடல் நுரையை பிடித்து பிள்ளையாரை உருவாக்கி பூஜை செய்தனர். அதன் பின் விநாயகர் அருளால் பாற்கடலில் இருந்து தேவர்கள் அமுதத்தை பெற்றனர். அந்த விநாயக மூர்த்தியைப் பிரதிஷ்டை திருவலஞ்சுழியே ஏற்ற இடம் என இங்கே வந்து  பிரதிஷ்டை செய்து வழிபட்டான் தேவேந்திரன்.

பிரதிஷ்டை செய்த இடத்தில் ஒரு கோவிலும் கட்டினார். அந்தக் கோவிலில் இன்றும் இந்திரன் பூஜித்த நுரையால் ஆன விநாயகர் தான் ஸ்வேத விநாயகர் என்னும் நிருநாமத்தோடு அருள் பாலிக்கிறார்.

மற்ற ஆலயங்களில் நடப்பது போன்ற அபிஷேகம் இவருக்கு இங்கே இல்லை. சுமார் 10 அங்குல உயரமே உள்ள இந்த வெள்ளைப் பிள்ளையாருக்கு புனுகு மட்டும் சாத்துவார்கள். மேலும் பச்சைக் கற்பூரத்தைக் குறிப்பிட்ட பக்குவத்தில் அரைத்து, அதை இந்த விநாகயரின் திருமேனியைத் தொடாமல் அவர் மேல் மெள்ள தூவி விடுவார் அர்ச்சகர். அதனால் இந்த விநாயகர் தீண்டாத் திருமேனி ஆவார். விநாயகர் துதிக்கை வலப்பக்கம் சுழித்துள்ளதால் திருவலஞ்சுழி என இத்தலம் பெயர் பெற்றதென்றும் கூறுவர்.

திருவலஞ்சுழி கோவில் அமைவிடம்

கும்பகோணம் - தஞ்சாவூர் ரயில் பாதையில், சுவாமிமலை நிலையத்திலிருந்து வடக்கே ஒரு கிமீ தூரத்தில் உள்ளது.

கும்பகோணம் - தஞ்சை நெடுஞ்சாலையில் இத்தலம் உள்ளது

அருகிலுள்ள தலங்கள்

சுவாமிமலை முருகன் திருக்கோவில்

நல்லூர் பஞ்சவர்ணேஸ்வரர் திருக்கோவில்

தாராசுரம் ஐராவதேஸ்வரர் திருக்கோவில்


கட்டுரையாளர்: தினேஷ் குகன்





உங்கள் கருத்தைப் பதிவு செய்ய :


Your comment will be posted after the moderation