விஜயால் கோவைக்கு ‘விஜய்’

பதிவு செய்த நாள் : 13 ஆகஸ்ட் 2017 00:23


சென்னை:

திருவள்ளூர் அணிக்கு எதிரான டி.என்.பி.எல்., ‘டுவென்டி-20’ தொடரில் முரளி விஜய் (69), அனிருத் சீதாராம் (69*) கைகொடுக்க 7 விக்கெட் வித்தியாசத்தில் கோவை வெற்றி பெற்றது.

இந்தியா சிமென்ட்ஸ் ஆதரவில் தமிழ்நாடு கிரிக்கெட் சங்கம் நடத்தும் இரண்டாவது ஆண்டு தமிழ்நாடு பிரிமீயர் ‘லீக்’ ‘டுவென்டி-20’ (டி.என்.பி.எல்.,) தொடர் சென்னை உட்பட பல்வேறு இடங்களில் நடைபெற்று வருகிறது. இந்த மெகா தொடரில் நடப்பு சாம்பியன் தூத்துக்குடி பேட்ரியாட்ஸ், 2-வது இடத்தை பிடித்த சேப்பாக் சூப்பர் கில்லீஸ், திண்டுக்கல் டிராகன்ஸ், திருவள்ளூர் வீரன்ஸ், ரூபி திருச்சி வாரியர்ஸ், கோவை கிங்ஸ், காரைக்குடி காளை, மதுரை சூப்பர் ஜெயின்ட்ஸ் ஆகிய எட்டு அணிகள் பங்கேற்கின்றன. முதலில் போட்டிகள் லீக் முறையில் நடக்கிறது. இதில், ஒவ்வொரு அணியும் மற்ற அணியுடன் ஒருமுறை மோதும். இதன் பின் அதாவது லீக் சுற்றின் முடிவில் புள்ளிகள் அடிப்படையில் முதல் நான்கு இடத்தைப் பிடிக்கும் அணிகள் அடுத்த சுற்றான ‘பிளே&ஆப்’ சுற்றுக்கு முன்னேறும்.

இத்தொடரின் 25வது லீக் ஆட்டம் சென்னை சேப்பாக்கம் எம்.ஏ., சிதம்பரம் ஸ்டேடியத்தில் நேற்று நடைபெற்றது. இதில், திருவள்ளூர், கோவை அணிகள் மோதின. ‘டாஸ்’ வென்ற கோவை கேப்டன் முரளி விஜய் முதலில் ‘பவுலிங்கை’ தேர்வு செய்தார். இந்த தொடரில் விஜய் விளையாடும் முதல் போட்டி இதுதான். திருவள்ளூர் அணிக்கு சதுர்வேத் (24), சிதார்த் (18) சுமாரான துவக்கம் கொடுத்தனர். இந்த நிலையில், கேப்டன் அபராஜித்துடன் ஹரி நிஷாந்த் இணைந்தார். அதிரடியாக விளையாடிய அபராஜித் அரைசதம் அடித்து அசத்தினார். ஹரி நிஷாந்த் (27) ரன் எடுத்து ஆட்டமிழந்தார். இவரைத் தொடர்ந்து அபராஜித்தும் வெளியேற ஆட்டம் பரபரப்பானது. அபராஜித் 60 ரன் (31 பந்து, 3 பவுண்டரி, 5 சிக்சர்) எடுத்தார்.

முக்கிய கட்டத்தில் களம் வந்த தண்வர் ‘ருத்ரதாண்டம்’ ஆடினார். எதிரணி பந்து வீச்சை நாலா புறமும் பறக்கச் செய்ய, ஸ்கோர் ராக்கெட் வேகத்தில் பறந்தது. அதே நேரம் ரங்கராஜன் (1), சஞ்சய் யாதவ் (0) சொதப்பினர். இருந்தும் அதிரடியாக விளையாடிய தண்வார் அரைசதம் அடித்தார். முடிவில் திருவள்ளூர் அணி 20 ஓவரில் 6 விக்கெட் இழப்புக்கு 196 ரன் குவித்தது. தண்வர் 55 (22 பந்து, 3 பவுண்டரி, 5 சிக்சர்), விக்கெட்கீப்பர் கவின் (6) ரன் எடுத்து ஆட்டமிழக்காமல் இருந்தனர். கோவை தரப்பில் விக்னேஷ், அஜித்ராம், சிவகுமார் தலா 2 விக்கெட் வீழ்த்தினர்.

கடின இலக்கை துரத்திய கோவை அணிக்கு கேப்டன் முரளி விஜய், சூர்யபிரகாஷ் இருவரும் தொடக்கம் தந்தனர். லட்சுமி நாராயணன் பந்தில் சூர்யபிரகாஷ் (5) நடையை கட்டினார். பின் விஜயுடன் அனிருத் சீதாராம் இணைந்தார். இருவரும் எதிரணி பந்து வீச்சை விளாசினர். குறிப்பாக, அதிரடியாக விளையாடிய விஜய் அரைசதம் அடிக்க ரசிகர்கள் ஆர்ப்பரித்தனர். இந்த ஜோடி 2வது விக்கெட்டுக்கு 104 ரன் சேர்த்த நிலையில், சஞ்சய் யாதவ் பந்தில் விஜய் ஆட்டமிழந்தார். இவர் 69 ரன் (44 பந்து, 5 பவுண்டரி, 4 சிக்சர்) எடுத்தார். 5 ஓவரில் 60 ரன் தேவைப்பட்டது. இந்த நேரத்தில் எழுச்சியுடன் விளையாடிய அனிருத் சீதாராம் 30 பந்தில் அரைசதம் அடித்தார். இவருக்கு சீனிவாசன் கம்பெனி கொடுத்தார்.

கடைசி ஓவரில் 11 ரன் தேவைப்பட தண்வர் பந்துவீச வந்தார். முதல் இரண்டு பந்தில் 3 ரன் கிடைத்தது. 3வது பந்தில் சீனிவாசன் (38) ஆட்டமிழந்தார். 3 பந்தில் 8 ரன் தேவைப்பட 4வது பந்தில் ஹரீஷ் 2 ரன் எடுத்தார். அடுத்த பந்தில் ஓரு ரன் மட்டுமே கிடைத்தது. 1 பந்தில் 5 ரன் தேவை என இருக்க சிக்சர் அடிக்க வேண்டிய நெருக்கடி ஏற்பட்டது. ஆனால், கடைசி பந்தை தண்வர் ‘நோபாலாக‘ வீசி இரண்டு ரன் (மொத்தம் 3 ரன்) கிடைத்தது. கடைசி பந்தில் வெற்றிக்கு தேவைப்பட்ட 2 ரன் எடுக்க கோவை அணி 20 ஓவரில் 3 விக்கெட் இழப்புக்கு 197 ரன் எடுத்து ‘திரில்’ வெற்றி பெற்றது.

அனிருத் சீதாராம் 69 (43 பந்து, 2 பவுண்டரி, 4 சிக்சர்), ஹரீஷ் குமார் (3) ரன் எடுத்து ஆட்டமிழக்காமல் இருந்தனர்.திருவள்ளூர் தரப்பில் லட்சுமி நாராயணன், சஞ்சய் யாதவ், தண்வர் தலா 1 விக்கெட் வீழ்த்தினர். ஆட்டநாயகனாக அனிருத் சீதாராம் தேர்வு செய்யப்பட்டார்.