காரைக்குடி அபார வெற்றி

பதிவு செய்த நாள் : 12 ஆகஸ்ட் 2017 00:37


திண்டுக்கல்:

திருச்சி அணிக்கு எதிரான டி.என்.பி.எல்., ‘டுவென்டி-20’ லீக் போட்டியில் அனிருத் (60), விஷால் வைத்யா (40) கைகொடுக்க காரைக்கடி 6 விக்கெட் வித்தியாசத்தில் அபார வெற்றி பெற்றது.

இந்தியா சிமென்ட்ஸ் ஆதரவில் தமிழ்நாடு கிரிக்கெட் சங்கம் நடத்தும் இரண்டாவது ஆண்டு தமிழ்நாடு பிரிமீயர் ‘லீக்’ ‘டுவென்டி-20’ (டி.என்.பி.எல்.,) தொடர் சென்னை உட்பட பல்வேறு இடங்களில் நடைபெற்று வருகிறது. இந்த மெகா தொடரில் நடப்பு சாம்பியன் தூத்துக்குடி பேட்ரியாட்ஸ், 2-வது இடத்தை பிடித்த சேப்பாக் சூப்பர் கில்லீஸ், திண்டுக்கல் டிராகன்ஸ், திருவள்ளூர் வீரன்ஸ், ரூபி திருச்சி வாரியர்ஸ், கோவை கிங்ஸ், காரைக்குடி காளை, மதுரை சூப்பர் ஜெயின்ட்ஸ் ஆகிய எட்டு அணிகள் பங்கேற்கின்றன. முதலில் போட்டிகள் லீக் முறையில் நடக்கிறது. இதில், ஒவ்வொரு அணியும் மற்ற அணியுடன் ஒருமுறை மோதும். இதன் பின் அதாவது லீக் சுற்றின் முடிவில் புள்ளிகள் அடிப்படையில் முதல் நான்கு இடத்தைப் பிடிக்கும் அணிகள் அடுத்த சுற்றான ‘பிளே-ஆப்’ சுற்றுக்கு முன்னேறும்.

இத்தொடரின் 24வது லீக் ஆட்டம் திண்டுக்கல்லில் உள்ள என்.பி.ஆர்., கல்லூரி மைதானத்தில் நேற்று நடைபெற்றது. இதில், காரைக்குடி, திருச்சி அணிகள் மோதின. ‘டாஸ்’ வென்ற திருச்சி கேப்டன் இந்திரஜித் முதலில் ‘பேட்டிங்கை’ தேர்வு செய்தார். திருச்சி அணிக்கு பரத் சங்கர், கேப்டன் இந்திரஜித் இருவரும் துவக்கம் தந்தனர். இந்திரஜித் 2 ரன்னில் ஆட்டமிழந்து அதிர்ச்சி கொடுத்தார். பின் பரத் சங்கருடன் ஆதித்ய கிரிதர் இணைந்தார். அதிரடியாக விளையாடிய பரத் சங்கர் சதம் விளாச ஸ்கோர் ராக்கெட் வேகத்தில் பறந்தது. அதித்ய கிரிதர் 27 ரன் எடுத்த நிலையில், ஷாஜகான் பந்தில் வெளியேறினார். அடுத்து வந்த அகுல் ஸ்ரீநாத்தும் விளாச திருச்சி அணி 20 ஓவரில் 2 விக்கெட் இழப்புக்கு 190 ரன் குவித்தது. பரத் சங்கர் 112 (68 பந்து, 10 பவுண்டரி, 7 சிக்சர்), அகில் ஸ்ரீநாத் 37 (25 பந்து, 3 பவுண்டரி, 1 சிக்சர்) ரன் எடுத்து ஆட்டமிழக்காமல் இருந்தனர். காரைக்குடி தரப்பில் ஷியாம், ஷாஜகான் தலா 1 விக்கெட் வீழ்த்தினர்.

கடின இலக்கை துரத்திய காரைக்குடி அணிக்கு விஷால் வைத்யா, அனிருத்தா ஸ்ரீகாந்த் இருவரும் சிறப்பான துவக்கம் தந்தனர். இந்த ஜோடி முதல் விக்கெட்டுக்கு 57 ரன் சேர்த்த நிலையில், விஷால் வைத்யா 19 பந்தில் 2 பவுண்டரி, 4 சிக்சர் உட்பட 40 ரன் எடுத்து பெவிலியன் திரும்பினார். முக்கிய கட்டத்தில் கேப்டன் பத்ரிநாத் (10), ஆதித்யா (16) ஏமாற்றினர். இருந்தும் அனிருத்தா அதிரடியாக அதிரடியாக விளையாடத் தொடங்க ஆட்டம் சூடுபிடித்தது. தவிர சீரான இடைவெளியில் விக்கெட்டுகள் சரிந்த போதும் காரைக்குடி அணி ஒரு ஓவருக்கு தலா 10 ரன்கள் எடுத்து வந்தது. 15 ஓவர் முடிவில் 150 ரன் எடுத்திருந்தது. அப்போது அனிருத்தா அரைசதம் கடந்தார். 5 ஓவரில் 41 ரன் தேவைப்பட்டது.

முக்கிய கட்டத்தில் வக்னேஷ் பந்தில் அனிருத்தா கிளீன் போல்டானார். இவர் 60 ரன் (42 பந்து, 3 பவுண்டரி, 4 சிக்சர்) எடுத்தார். 3 ஓவரில் 24 ரன் தேவை என இருந்தது. இந்த நிலையில், ஷாஜகான் (39), கணபதி (20) ஆட்டமிழக்காமல் கைகொடுக்க காரைக்குடி அணி 18.5 ஓவரில் 4 விக்கெட் இழப்புக்கு 193 ரன் எடுத்து அபார வெற்றி பெற்றது. திருச்சி தரப்பில் விக்னேஷ், கவுசிக், பிரபு தலா 1 விக்கெட் வீழ்த்தினர்.

இந்த வெற்றியின் மூலம் காரைக்குடி அணி இதுவரை விளையாடிய 7 போட்டிகளில் 4 வெற்றி, 3 தோல்வி என மொத்தம் 8 புள்ளிகளுடன் புள்ளிப் பட்டியலில் 3வது இடத்திற்கு முன்னேறியது. திருச்சி அணி 6 போட்டிகளில் 5 தோல்வி, ஓரு வெற்றி என மொத்தம் 2 புள்ளிகளுடன் 7 இடத்தில் உள்ளது. இந்த அணி ஏற்கனவே ‘பிளே&ஆப்’ சுற்று வாய்ப்பை இழந்தது குறிப்பிடத்தக்கது.