நீட் தேர்விலிருந்து விலக்கு கோரி பிரதமரிடம் முதல்வர் பழனிசாமி வலியுறுத்தல்

பதிவு செய்த நாள் : 11 ஆகஸ்ட் 2017 15:04

புதுடில்லி
13வது துணை குடியரசுத் தலைவராக வெங்கையா நாயுடு பதவியேற்கும் விழாவில் கலந்துகொள்ள வந்த தமிழ்நாடு முதல்வர் எடப்பாடி பழனிசாமி இன்று பிரதமர் நரேந்திர மோடியைச் சந்தித்துப் பேசினார்.


நாட்டின் 13ஆவது துணை குடியரசுத் தலைவராக வெங்கையா நாயுடு தேர்வு செய்யப்பட்டார். அவரது பதவியேற்பு விழா இன்று குடியரசு தலைவர் மாளிகையில் நடந்தது. அவருக்கு இந்திய ஜனாதிபதி ராம்நாத் கோவிந்த் பதவி பிரமாணம் செய்து வைத்தார்.

இந்த விழாவில் பிரதமர் நரேந்திர மோடி, மத்திய அமைச்சர்கள், மாநில முதலமைச்சர்கள், தமிழக முதல்வர் எடப்பாடி பழனிசாமி, முன்னாள் முதல்வர் ஓ.பன்னீர்செல்வம் ஆகியோர் கலந்து கொண்டனர்.


முதல்வர் – பிரதமர் சந்திப்பு

முதல்வர் எடப்பாடி பழனிசாமி பிரதமர் நரேந்திர மோடியை காலை 11.30 மணியளவில் சந்தித்து பேசினார்.

நாடாளுமன்ற வளாகத்தில் உள்ள பிரதமர் அலுவலகத்தில் பிரதமர் மோடியுடன், முதலமைச்சர் எடப்பாடி கே.  பழனிசாமி , மக்களவை துணை சபாநாயகர் தம்பிதுரை, தலைமைச் செயலாளர் கிரிஜா வைத்தியநாதன் ஆகியோர் சந்தித்தனர். அப்போது, தமிழகத்துக்கு நீட் தேர்வில் இருந்து விலக்கு அளிப்பது, விவசாயிகள் பிரச்சினை, தமிழகத்திற்கு அதிக நிதி ஒதுக்குவது உள்ளிட்ட பல்வேறு விஷயங்கள் குறித்தும் தமிழக முதல்வர் பிரதமருடன்  பேசியுள்ளார்.