அமைச்சர்கள் மீது தேர்தல் ஆணையம் நடவடிக்கை: விஜயகாந்த் வரவேற்பு

பதிவு செய்த நாள் : 19 ஜூன் 2017 16:00

சென்னை,

ஆர்.கே.நகர் பணப் பட்டுவாடா புகாரில் குற்றமற்றவர் என நிரூபிக்காவிட்டால் ஆளும் கட்சியினர் பதவி விலக வேண்டும். இதுதொடர்பாக வழக்கு பதிவு செய்ய தேர்தல் ஆணையம் உத்தரவிட்டது வரவேற்கத் தகுந்தது என்று தேமுதிக தலைவர் விஜயகாந்த் கூறினார்.


இது தொடர்பாக இன்று அவர் வெளியிட்ட அறிக்கையில், ஆர்.கே.நகர் இடைத்தேர்தலுக்காக வாக்காளர்களுக்கு பணப் பட்டுவாடா செய்ததை உறுதி செய்யப்பட்டதன் விளைவாக ஆர்.கே. நகர் இடைத்தேர்தல், தேர்தல் ஆணையத்தால் நிறுத்தப்பட்டது.

பணப்பட்டுவாடாவோடு சம்பந்தப்பட்டவர்களாக கருதப்படும் முதல்வர் எடப்பாடி பழனிசாமி மீதும், வேட்பாளர் டிடிவி தினகரன் மற்றும் நான்கு தமிழக அமைச்சர்கள் மீது வழக்கு தொடர வேண்டும் என இந்தியத் தேர்தல் ஆணையம் உத்தரவு பிறப்பித்தது வரவேற்கத்தக்கது.

விசாரணையில் குற்றமற்றவர் என நிரூபிக்கத் தவறினால் அவர்கள் ஆட்சி செய்ய தகுதியில்லாதவர்களாக கருதப்படுவார்கள். தேர்தல் ஆணையத்தின் உத்தரவை ஏற்று இவர்கள் வாக்காளர்களுக்கு பணப் பட்டுவாடா செய்யப்பட்டது குறித்து வருமான வரித்துறையும் ஆய்வு செய்யவேண்டும். எனவே அதிமுக அரசு இதற்கான விளக்கத்தை உடனடியாக கொடுக்கவேண்டும்.

இதுபோன்ற நடவடிக்கைகள் எடுக்கும் பட்சத்தில், இனிவரும் காலங்களில் தேர்தல்கள் நியாயமாகவும், நேர்மையாகவும் நடக்கும் என்பதில் எந்த ஐயப்பாடும் இல்லை. அந்தவகையில் தேர்தல் ஆணையத்தின் இந்த உத்தரவை தேமுதிக வரவேற்கிறது என்று தேமுதிக தலைவர் விஜயகாந்த் தெரிவித்துள்ளார்.