ரம்ஜான் நோன்பு நாளை தொடக்கம்

பதிவு செய்த நாள் : 27 மே 2017 15:02

சென்னை:

ரம்ஜான் நோன்பு நாளை-ஞாயிற்றுக்கிழமை- தொடங்கும் (28.5.2017) என்று தமிழக அரசின் தலைமை காஜி சலாவுதீன் முகமது அயூப் அறிவித்துள்ளார்.

இஸ்லாமியர்கள் ரம்ஜான் மாதத்தின் 30 நாள்களும் நோன்பிருந்து ஐந்து வேளை தொழுகை செய்வார்கள். வானில் தோன்றும் பிறையை வைத்து ரம்ஜானுக்கு நோன்பு தொடங்கப்படுவது ஆனால், பிறை தென்படாவிட்டால் ரம்ஜான் மாதத்தின் முதல் தேதியில் இருந்து நோன்பை தொடங்குவார்கள்.
இந்தாண்டு தமிழ்நாடு உள்ளிட்ட சில மாநிலங்களில் ரம்ஜான் நோன்பு தொடங்குவதற்கான பிறை ஏதும் நேற்று வரை தென்படவில்லை. எனவே, ரம்ஜான் மாதத்தின் முதல் தேதியில் இருந்து நோன்பு தொடங்க முடிவெடுக்கப்பட்டுள்ளது. ரம்ஜான் மாதம் நாளை தொடங்குகிறது.

இதுகுறித்து தமிழக அரசின் தலைமை காஜியார் சலாவுதீன் முகமது அயூப் கூறியதாவது:

ரம்ஜான் நோன்பு என்பது இஸ்லாமியர்களின் 5 கடமைகளில் ஒன்று. தமிழகத்தில் 26ம் தேதியன்று பிறை தென்படவில்லை. எனவே, ரம்ஜான் மாத முதல் நாளான நாளை நோன்பு தொடங்கும். அனைத்து பள்ளிவாசல்களிலும் தராவீஹ் என்ற சிறப்பு தொழுகை இன்று முதல் தொடங்கும்.

பள்ளிவாசல்களில் மாலையில் நோன்பு திறக்கப்படும். அதற்காக அனைத்து பள்ளிவாசல்களிலும் சிறப்பு ஏற்பாடுகள் செய்யப்பட்டுள்ளன.

நோன்பின் 27-ம் நாள் லைலத்துல்கத்ரு இரவாகவும், நோன்பின் கடைசி நாள் ரம்ஜான் பண்டிகையாகவும் இஸ்லாமியர்கள் கொண்டாடுகிறார்கள்.

சென்னையில் நோன்பு இருக்கும் இஸ்லாமியர்களுக்கு ஷஹர் என்ற உணவு இலவசமாக வழங்க 60-க்கும் மேற்பட்ட இடங்களில் ஏற்பாடு செய்யப்பட்டுள்ளது. இவ்வாறு சலாவுதீன் முகமது அயூப் கூறினார்.