பலன் தரும் பஞ்சகவ்யம் 20-1-16

பதிவு செய்த நாள்

20
ஜனவரி 2016
16:14

பஞ்சகவ்யம் என்பது பசு மாட்டில் இருந்து கிடைக்கும் பொருட்களில் இருந்து தயாரிக்கப்படுகிறது. இது பயிர்களின் வளர்ச்சியை ஊக்குவித்து நோய் எதிர்ப்புச் சக்தியைத் தரக்கூடிய இயற்கை ஊட்டச்சத்து உரமாக விளங்குகிறது. இதன் மூலம் பயிர்கள், மண்ணின் தன்மையை மேம்படுத்தலாம். ரசாயன உரங்களால் ஏற்படும் கேடுகளுக்கு முற்றுப்புள்ளி வைக்கும் வகையில் பஞ்சகவ்யத்தைப் பயன்படுத்தலாம் என வேளாண் வல்லுனர்கள் கூறுகின்றனர்.

தேவையான பொருட்கள்

பஞ்சகவ்யம் தயாரிக்க பசுவின் புதுசாணம் 5 கிலோ, பசுவின் கோமியம் 3 லிட்டர், பசும்பால் 2 லிட்டர், பசுந்தயிர் 2 லிட்டர், பசுநெய் 1 லிட்டர், கரும்புச்சாறு 3 லிட்டர், இளநீர் 2 லிட்டர், வாழைப்பழம் 12 எண்ணம், கள் 2 லிட்டர் தேவை. கரும்புச்சாறு கிடைக்கவில்லை எனில் 500 கிராம் நாட்டுச்சர்க்கரையுடன் 200 கிராம் ஈஸ்ட் சேர்த்து 3 லிட்டர் நீரில் ஊற வைத்தால் 30 நிமிடங்களில் அதே தன்மையுடைய கரைசல் கிடைக்கும்.

தயாரிக்கும் முறை :

பசுவின் புதுசாணம், கோமியம், நெய்யை நன்கு கலந்து 3 நாட்களுக்கு அடிக்கடி கலக்கி வைக்க வேண்டும். 4 ம்நாள் இந்தக் கலவையுடன் இதரப் பொருட்களான தயிர், நெய், கரும்புச்சாறு, இளநீர், வாழைப்பழங்கள், கள்ளை சேர்த்து கலக்க வேண்டும். இந்தக் கலவையை குறைந்தபட்சம் 4 நாட்கள் நன்கு கலக்கி 15 நாட்கள் வைத்திருந்து, 19 ம்நாள் முதல் பயிர்களில் தெளிக்கலாம்.

சத்துக்கள்

பசும்சாணத்தில் பாக்டீரியா, பூஞ்சாணம், நுண்சத்துக்கள், பாலில் புரதம், கொழுப்பு, மாவு, அமினோ அமிலம், கால்சியம் சத்துக்கள், தயிரில் ஜீரணிக்கத்தக்க செரிமானத்தன்மையை தரவல்ல நுண்ணுயிர்கள், நெய்யில் வைட்டமின் ஏ, பி, கால்சியம், கொழுப்புச்சத்து, கரும்புச்சாறில் சைக்கடோகைனின் என்னும் வளர்ச்சி ஊக்கி, அனைத்து வகை தாது உப்புகள், இளநீரில் நுண்ணுயிர் வளர்ச்சிக்கான இனிப்பு, வாழைப்பழத்தில் தாது உப்புகள், நொதிப்பு நிலை தரும் நுண்ணூட்டச்சத்து உள்ளது.

முறையாக தயாரிக்கப்பட்ட பஞ்சகவ்யத்தில் பயிர் வளர்ச்சிக்கும், நோய் எதிர்ப்புக்கும், உறுதுணையாக விளங்கும் நுண்ணுயிர்கள் அசோஸ்பைரில்லம், அசட்டோபேக்டர், பாஸ்போபாக்டீரியா, சூடோமோனாஸ், பேரூட்டச்சத்துக்கள், நுண்ணூட்டச்சத்துக்கள், வளர்ச்சி ஊக்கிகள் உட்பட பயிர்களுக்கு தேவையான அனைத்தும் உள்ளன.

பயன்பாடு முறை:

பஞ்சகவ்யம் 300 மில்லி மருந்தை 10 லிட்டர் நீரில் கலந்து விசைத்தெளிப்பான், கைத்தெளிப்பான் மூலம் பயிர்களில் படும் வகையில் காலை அல்லது மாலையில் தெளிக்கலாம். ஒரு ஏக்கர் பயிருக்கு ஒரு முறை தெளிக்க 3 லிட்டர் பஞ்சகவ்யம் தேவைப்படும். இந்தக் கரைசலை தெளிப்பான்களில் ஊற்றிப் பயன்படுத்தும் போது கைத்தெளிப்பான் எனில் வடிகட்டியும், விசைத்தெளிப்பான் எனில் அதன் வால்வு, குழாயின் நுனிப்பகுதியைப் பெரிதாக்கிக் கொண்டும் பயன்படுத்த வேண்டும்.

தகவல்: சி. ராஜாபாபு, உதவிப் பேராசிரியர், வேளாண் உதவி மையம், பாளையங்கோட்டை.