ஆஸ்திரேலிய ஓபன் டென்னிஸ்: செரீனா வில்லியம்ஸ் சாம்பியன்

பதிவு செய்த நாள் : 28 ஜனவரி 2017 20:12

மெல்போர்ன்,

ஆஸ்திரேலிய ஓபன் டென்னிஸ் போட்டியில் அமெரிக்க வீராங்கனை செரீனா வில்லியம்ஸ் சாம்பியன் பட்டம் வென்றார்.

கிராண்ட் ஸ்லாம் போட்டிகளில் ஒன்றான ஆஸ்திரேலிய ஓபன் டென்னிஸ் போட்டி மெல்போர்ன் நகரில் நடைபெற்று வருகிறது. இதில் பெண்கள் ஒற்றையர் பிரிவில் இன்று நடந்த இறுதிப்போட்டியில் தரவரிசையில் 2-ம் இடம் வகிக்கும் செரீனா வில்லியம்சும், (அமெரிக்கா),  அவரது சகோதரியும் 13-ம் நிலை வீராங்கனையுமான வீனஸ் வில்லியம்சும் பலப்பரீட்சை நடத்தினார்கள்.

விறுவிறுப்பாக நடைபெற்ற இந்தப் போட்டியில், செரீனா வில்லியம்ஸ், வீனஸ் வில்லியம்ஸை 6-4, 6-4 என்ற நேர் செட் கணக்கில் தோற்கடித்து ஆஸ்திரேலிய ஓபன் சாம்பியன் பட்டத்தை கைப்பற்றினார். ஒட்டுமொத்தமாக செரினா வில்லியம்ஸ் பெறும் 23-வது கிராண்ட்ஸ்லாம் பட்டம் இதுவாகும். ஆஸ்திரேலிய ஓபன் டென்னிஸில் பட்டம் பெறுவது இது 7-வது முறையாகும். கிராண்ட்ஸ்லாம் பட்டங்களில் அதிகபட்சமாக ஆஸ்திரேலியாவின் மார்க்ரெட் கோர்ட் 24 பட்டங்களை வென்று முதலிடத்தில் உள்ளார். இன்னும் ஒரு கிராண்ட்ஸ்லாம் பட்டம் வென்றால் செரினா வில்லியம்ஸ் அந்த சாதனையை சமன் செய்து விடுவார்.