பெண்கள் ஹாக்கி: இந்தியா வெற்றி

பதிவு செய்த நாள்

23
ஜூலை 2016
17:28

மன்ஹெய்ம் : கனடா அணிக்கு எதிரான முதலாவது ஹாக்கி போட்டியில் இந்திய பெண்கள் ஹாக்கி அணி 5–2 என்ற கோல் கணக்கில் அபார வெற்றி பெற்றது.

பிரேசில் தலைநகர் ரியோ டி ஜெனீரோவில் ஒலிம்பிக் போட்டி (ஆக.5–21) நடக்க உள்ளது. இப்போட்டிக்கு 36 ஆண்டுக்குப் பின் இந்திய பெண்கள் ஹாக்கி அணி தகுதி பெற்றுள்ளது. இப்போட்டிக்கு தயாராகும் வகையில் இந்திய பெண்கள் அணி அமெரிக்கா (2 போட்டி), கனடா (3 போட்டி) அணிகளுடன் விளையாடுகிறது. அமெரிக்காவுக்கு எதிரான முதல் போட்டியில் அதிர்சி தோல்வியுற்ற இந்திய அணி பின் எழுச்சி பெற்று 2வது போட்டியில் வெற்றி பெற்று பதிலடி கொடுத்தது. இந்த நிலையில், இந்திய அணி கனடாவுடன் 3 போட்டிகளில் மோதுகிறது. இதன் முதலாவது போட்டி நேற்று நடந்தது.

இப்போட்டியின் துவக்கத்திலிருந்தே இந்திய வீராங்கனைகள் ஆதிக்கம் செலுத்தி வந்தனர். ஆட்டத்தின் 9வது நிமிடத்தில் வந்தனா முதல் கோலை அடித்து 1–0 என முன்னிலை படுத்தினார். இதற்கு 17வது நிமிடத்தில் கிடைத்த பெனால்டி கார்னர் வாப்பில் கனடாவின் ஸ்டீபினி நார்லாண்டர் பதில் கோலை அடித்து அசத்தினார். பின் 36வது நிமிடத்தில் இந்தியாவின் தீபிகா, ஒரு கோல் அடித்து அணிக்கு முன்னிலை ஏற்படுத்திக் கொடுத்தார். ஆனால் இது நிலைக்கவில்லை. கனடாவின் ஸ்டைர்ஸ் ஒரு கோல் அடித்து 2–2 என சமநிலை பெறச் செய்தார்.

கடைசி கால்பகுதியில் ஆதிக்கம் செலுத்திய இந்திய அணிக்கு தீபிகா (49வது நிமிடம்), வந்தனா (51வது) பூணம் ராணி (58வது) தலா ஒரு கோல் அடித்து அசத்தினர். கடைசி நிமிடம் வரை போராடிய கனடா வீராங்கனைகளால் கூடுதலாக கோல் எதுவும் அடிக்க முடியவில்லை. இதையடுத்து, ஆட்டநேர முடிவில் இந்தியா 5–2 என்ற கோல் கணக்கில் அபார வெற்றி பெற்றது.